In man di Russi, Austriach e compagnia bèlla, ghe stèmm
per trèdes mes e poeu g’hemm on cambiament de scèna per merit
de Napoleon. Bonapart l’è reduce da l’Egitt, el venc la gran battaglia
de Marengo el quattordes Giugn del 1800 e el torna a vegnì a Milan.
El vendicativ Francesch, Imperator d’Austria, quant el sent che Napoleon
l’è adree a travèrsà i Alp el mangia cadènn.
La prima roba che’l fa l’è quèlla de mandà in todescheria,
ligaa come tanti salamm, tutt i noster faa presonee… presonee politich
s’intend. Napoleon l’entra in Milan accolt da la popolazion cont grand
entusiasmo e applausi delirant. El ristabiliss subit la Repubblica, el
fa demolì tucc i fortificazion attorna al Castèll faa di
spagnoeu e che occupaven quasi tutt el spazi, che, incoeu, l’è el
Foro Bonapart. A la Repubblica Cisalpina, che la gh’aveva bisogn de vèss
riordinada per tanti motiv, ghe pensa Napoleon; nominaa a Lion, dove momentaneament
el se trovava, President de la Repubblica e come Vice President, che’l
poda supplill a l’occorenza, el cont Melz che l’ha savuu mostrass dègn
de l’incarich. La Cisalpina l’ha ciappa el nomm de Repubblica Lombarda
e la dura fina al 1804, che l’è la data cont la qual g’ha fin anca
quèlla francesa, Napoleon el ven faa Imperator de Francia e poeu
Re d’italia. Napoleon el mètt in coo la Corona Ferrea d’Italia el
vintises Magg del 1805 in Domm esclamand: "Dio me l’ha data, guai a chi
la tocca! ". L’ha faa vicerè el so figliaster Eugenio Beauharnais
al qual el g’ha daa per miee la tosa del Re de Baviera, la bèlla
e tanto bona Augusta Amalia. Fina chi pararia che i robb dovèssen
andà anca minga mal, ma Napoleon l’è ‘l moto perpetuo e i
continov guèrr el porten a la malora e nun cont lu per i spes enormi
che costen e nun vegnevom de conseguenza spremuu come limon, senza cuntà
el sangu di noster valoros soldaa che in tucc i battali se faseven onor
grandissim. L’avversion vers el Bonapart comencen a sentilla anca i patriota
pussee sincer. A damm el colp de grazia ven el disaster in Russia nel 1812
al ponto che tanti avarien desideraa de tornà sotta al domini Austriach,
menter i così dètt Italiani puri vorreven l’indipendenza
del Regno d’Italia. Ma intanta che quèsti vagheggiaven la libertaa
d’Italia, i Sovrani che gh’aveven mèttuu el baston in di roeud a
Napoleon, me disen on bordèll de bèi paroll, me fann on bordèll
de promèss de rispèttà i noster diritti e finissen
cont dichiaramm suddit de l’Imperator d’Austria per el semplice motiv che
prima del 1796 serom aggregaa al so domini. ? E tutt i promèss?
Mantegnuu nanca voeuna. In quanto al Regno de Napoleon devom confessà
che’l gh’a. vuu on periodo de grand attivitaa che se podaria anca ciamall
classich, per cèrti leg e per tanti innovazion. G’hemm avuu la coscrizion,
l’Arèna, i archi de Porta Cines e Porta Noeuva, la facciada del
Domm, el gran parch de Monza e anca l’inizi de l’Arco de la Pace. Credii
minga però che tucc stii bèi robb ghi devom ai frances!…
Ma nanca per sogn! I minister de Napoleon eren di egoisti come el Talleyrand,
i generai prepotent e avid come Brune e Murat, i amministrator cattiv e
bon de fa nient come Pinsot e Fouchè. Parlèmm no poeu del
segretari general Mèjan che l’era ona vera bandiroeula. Ma gh’era
minga el vicerè? Sì!… Ma quèll l’era on vicerè
de parada!... On magatèll che’l faseven ballà come vorreven.
El merit de tucc stii innovazion ghe’l devom a di ver italian che rispondeven
al nomm de: Francesco Melzi Duca de Lod, Simonètta, Moron, Arese,
Verri, Aldini, Luosi, Moscati, Paradisi, Veneri, Spanocchi, Vaccari, Greppi,
Dandolo, Cicognara, Teulliè, Nain, Prina, Boari, ver amministrator
coi rognon. E se pò minga lassà indree i cooperator valent
come l’Antolini, el Cagnola, el Canonica, el Manfredini, l’Appiani, el
Canova, el Tamburini, el Gioia, el Romagnosi, el Volta, el Scarpa, l’Oriani,
el Brunacci, el Monti, el Foscolo, el Pindemonte, el Cesarotti e el Lamberti.
Tutta gent che militava in di camp de l’architettura, di scienz fisich
e morai e de la letteratura. A lor devom propi tanto, ma ai frances… nient
del tutt! El vicerè Eugèni, contrastaa dal partii italian
del Confalonieri e da quèll austriach, del Gambarana e pù
sostegnuu dal Melz, vègg e gottos, nè dal Senaa, che’l saveva
pù cosa ghe n’aveva in saccoccia per l’orribil massacro del Prina,
el Princip el se ritira in Baviera in cà del pà de lee, Massimilian,
intanta che’l maresciall austriach Bellegard l’entra in Milan a digh ai
milanes che’l padron del regno l’era el scior Francesco I, Imperator d’Austria
- I eredi de Maria Teresa g’hann minga cèrt nè ‘l coeur nè
la bontaa di so antenati. Me dispias, ma prima de andà avanti
a cuntaff su di noster padron noeuv, sotta el giogo di quai dovarèmm
stagh, se ve fa nagotta, fina al 1859, devi, per amor o per forza, strengev
on poo el coeur. L’è el vint de April del 1814. La plebaglia, cont
ona ferocia de no di, la dispèrd el Senato e la fischia sonorament
i so minister, tanti di quai ghe deven la vita al cont Verri, insci ben
vist de la popolazion, che’l ghe fa de scud. La folla, capitanada dal cont
Aquila, l’entra furibonda ne la sala del Consilli e la fa scempi de tutt.
Ai bust del vicerè Eugèni ghe spacchen la tèsta e
on gran quader a oli de Napoleon, faa da l’Appiani, el ven passaa da ona
part a l’altra cont on’ombrèlla dal cont Aquila. Tanti voeuren però
che a capitanà la folla ghe fuss el Confalonieri e minga el cont
Aquila, e per conseguenza el saria staa el Confalonieri a passà
d’ona part a l’altra, cont l’ombrèlla, el quader de l’Appiani… ma
francament me par fina impossibil. Però!...
Se voeur el Prina che, pover diavol, el gh’aveva la sola colpa de
vèss el minister di finanz. In mèzz a la folla inferocida
gh’è on capmaster… pussee inferocii di alter per vorrè el
Prina; avendel minga trovaa al Senaa el sè mètt a vosà:
A cà del Prina! … A cà del Prina! … e tucc i alter risponden
inviandes: A cà del Prina! … che l’era dove gh’è adèss
el teater Manzon. |
Computers
