| A pocch a pocch. -. i bollenti spirit s’hinn calmaa. -. e tant i
nobil che i plebèi hinn soggètt a la leg e tucc obbligaa
a pagà i tass. E l’è giusta, se la leg l’ha devèss
ugual per tucc! Bonapart el sta a Milan vott dì, durant i quai l’ha
faa on bordèll de cambiament per dagh ona forma repubblicana e tutt
quèll che se faseva el doveva vèss faa in nomm de la Repubblica
Francesa. Intanta el Castèll l’era assediaa e da l’artiglieria che
le difendeva è staa danneggiaa la popolazion che la gh’aveva ona
paura malarbètta. Ma anca el Castèll el finiss cont el capitolà
el vintinoeuv de Giugn. E cosa el doveva fa? Gh’era de bisogn de rinforzà
l’esèrcit frances che’l combatteva in Italia e Napoleon, che’l gh’aveva
el desideri che se ridestass el valor militar italian, l’ha istituii ona
Legion Lombarda e da quèsta è saltaa foeura el nucleo de
quèll esèrcit che’l s’è tanto gloriosament segnalaa
in tutt i guèrr napoleonich. La Legion Lombarda, la portava, come
distintiv, ona placca de metall cont el motto: « Libertà Italiana
» e col temp s’è poeu unii a la nostra Legion quèlla
de la provincia de Bologna, Ferrara, Reggio e Modena, che hann poeu formaa
la confederazion così dètta Cispadana. In del 1797
ven creaa la Repubblica Cisalpina, el Governo de la qual el doveva vègh
sede in Milan. La noeuva Repubblica la ven inaugurada el noeuv de Luj cont
ona gran fèsta militar clamorosissima, propi in del Lazzarètt
che, per l’occasion, l’hann battèzzaa Càmpo di Marte. Ma
l’è minga tutt or quèll che lus ... La Repubblica Cisalpina
che la doveva vèss indipendent... l’era domà de nomm. Impost
sora impost, minga domà per i bisogn de la guèrra, ma per
tutt i italian che gh’era a la tèsta e che gh’aveven i dent in gola.
A Milan, poeu, che l’era la capital, fioccaven giò tucc quèi
che cercaven semper de pescà in del torbid e bisogna confessà
che l’era on ben a vèss sotta la tutèla de la Francia perchè
se no Milan, minacciada de pericol da tucc i part, l’avaria cèrt
minga poduu resist. Ma el mal l’è che in del 1799 Napoleon l’è
in Egitt e intanta tutta l’opera di frances in Italia, Milan compres, la
va in rovina, sotta i colp de l’Austria e de la Russia che, per fammela
di, s’eren mèttuu insèmma. El vintisètt April del
stèss ann 1799, i austriach e i russi riporten ona gran vittoria
a Cassan d’Adda che la ghe dà in man tutta la Lombardia. A Milan,
che saveven nagott de nagotta, vègnen avvertii... da ona longa fila
de carr pien de ferii frances e italian. Podii immaginaff come sien rèstaa
i bon milanes davanti a quèll spèttacol che se specciaven
minga cèrt!... I vincitor, come l’era de prevedèss, - travèrsen
l’Adda e vègnen subit vèrs Milan. I consilli de la Cisalpina
se scioglien e in cittaà non ghe rèsta che on poo de centènn
de soldaa saraa denter in del Castèll, ma malgrado tutta la bona
volontaa, la soa resistenza la dura nanca on mes. Dopo la resa entra per
la prima volta a Milan. -. Chii?!... Nientemen... che i Cosacch . - - Quèlla
specie de selvaggi?! Propi! L’è inutil!... Quand se dis che Milan
l’è semper staa in man de can e borian s’è ditt tutt e ghe
saria minga de - meravigliass se on bèll dì fuss vegnuu a
vantà i diritti su la Lombardia anca i. - - Pellerossi. Quèll
che hann faa i Russi, i Cosacch e i Austriach, veri ladroni e assassin,
l’è al de là d’ogni immaginazion. Robaven, feriven, massacraven
e specialment i pover curat de campagna se ghe daven no i danee che vorreven.
I donn e i tosann per paura se saraven in gesa, ma lor andaven a sfondà
i port e abusaven de quij pover tosann fina sui basèi di altar.
Robaven tutta la roba sacra, ma... devot come eren, se ungeven i scarp
cont l’oli sant. A minga pocch donn g’hann strappaa i orègg e tajaa
i dit per podè portagh via i boccol e i anèi. Prima però
de portagh via i crosètt d’or che gh’aveven al coll, se faseven
el sègn de la Santa Cros. L’è inutil, quand la religion la
gh’è la gh’è... e stori ghe n’è minga! Tanti fioeu
vegneven mazzaa sotta i oeucc di so mamm e tanti marì vegneven ligaa
ai piant perchè podessen assist, senza reagì, al scempi che
lor faseven di so miee. Chii gh’àvèss avuu indoss o in cà
on ritratt de Napoleon, on vèstii segond la moda de l’ann prima
o on cappèll a la giacobina, l’era la preson o l’esilli! Nanca i
cavèi a la Brutus se podeva minga portà, perchè segond
lor l’era on sègn de cattiveria. La Commission Imperial l’era
composta dai giureconsult Manzoni, Drago e Bazzetta, che ne faseven anca
lor d’ogni erba on fass. Basta di che g’hann avuu el coragg de fa mètt
in preson on pover bagaj de cinqu ann perchè l’aveva vosaa: Viva
la Francia! Ma se la Commission la comètteva di barbaritaa la faseva
anca di robb ridicol, come quèlla de fa ciamà davanti a lee
on mèrlo che l’aveva imparaa ona canzon repubblicana e le cantava
che l’era on piesè! … El mèrlo, davanti a la Commission,
el g’ha minga avuu nissuna sudizion e l’ha cantaa la soa brava canzon magnificament.
I giudes, meravigliaa de l’impertinenza del mèrlo, eren lì
per condannall, ma; capii la figura barbina che avarien faa, hann pensaa
ben de lassalla buj. Di trè personn che formaven la Commission
gh’era ona satira che diseva: Due han di bestia il
nome, un la figura e tutt'e tre son bestie di natura. L’universitaa
de Pavia la ven sarada e tanti professor mèttuu in preson e fra
quèsti el Moscati. Me sont dimenticaa de diff, e la mia la saria
stada ona dimenticanza imperdonabil, che in mèzz a tanta cattiveria
e a tanto bordèll, on omm sol el gh’aveva el cervèll a post
e che’l s’era minga lassaa trascinà dai esaltazion di milanes a
l’entrada di frances e stoo omm l’era el cont Francesco Melzi d’Eril, destinaa
a diventà Duca de Lod e che appunto per la soa manera de vedè
i robb l’era staa bersagliaa, osteggiaa e mèss in preson tant dai
vinti che dai vincitor. Soltant Napoleon el capiss l’omm che l’è
e le dimentica no. |
Computers
