Computers
| Computers |
|
melegnano.net | |
 |
|
 |
| Leopold II el governa per pocch, ma anca lu el fa molto ben a Milan
e el se dimostra verament quell princip filosof e filantrop che l’era.
E quand l’ha lassaa Milan per andà a Vienna, perchè se capiss
che’l podeva minga sta semper chi, la popolazion la g’ha auguraa tutt el
ben e tutta la felicitaa che’l se meritava... ma quèlla purtropp
l’è stada l’ultima volta che i milanes l’hann veduu. A Vienna,
el primm de Marz del 1792, Leopold l’esala l’ultim respir a quarantacinqu
ann e dopo domà duu ann de regno. E l’è el tèrz austriach
che i milanes cont dolor sentii e sincer hann vist a sparì. Cont
la mort de Leopoldo II cèssa per nun la tranquillitaa. I milanes
agitaa se gratten in coo, hinn pien de presentiment che purtropp diventen
realtaa, perché la rivoluzion Francesa la pòrta pussee de
vint ann de guèrra durant i quai Milan l’è staa on poo sede
del Governo de la Repubblica Cisalpina, on poo de quèll de la Repubblica
Italiana, poeu capital del Regno d’Italia.. - fin che l’è tornada
sotta a l’Austria nel 1814, diventand la sede del Governo. El Direttorio
de Paris el ghe affida l’esèrcit a Napoleone Bonaparte, nassuu a
Aiaccio de Corsica, el quindes Agost del 1768; l’Austria, l’Inghilterra,
la Prussia, la Spagna, el Piemont, Roma e Napoli, corren in armi per vedè
de mèttegh on argin. -. ma Napoleon el romp i Sardi e i Imperiaj
a Montenotte, a Milesimo, al pont de Lod e l’entra in Milan el quattordes
de Magg del 1796, tranquill come on Papa, da Porta Romana. El periodo frances
el passa su Milan lassand del bon e del cattiv che gh’è ancamò
incoeu. Hinn dersètt ann de storia che osaria a di che varen pussee
de cent per tucc i cambiament che gh’è staa de idèi, de criteri
politich, de istituzion, de personn, de tutt insomma! E se pò minga
dagh tort al Bonfadini che’l dis: "Nessuna generazione aveva mai fatto
in più di tre lustri una esperienza di cose umane così segnalata".
El conferma poeu che Milan, a l’entrada del general Bonapart, el gh’aveva
ancamò del medioeval e che poeu el se dissedaa... ona città
moderna. Va ben tùtt!... Ve disarien i miìanes de allora
se podèssen tornà indree… ma nissun de vialter ha provaa
quèll che hemm provaa nun. Vialter ripetii come pàppagai
” furia francesa “ ma bisogna lassamel di a nun cosa l’era... la furia
francesa!... I frances hinn piombaa giò come ona saètta,
matt, violent, bèstemmiador, dopo che aveven vengiuu ona battaglia
al dì e stravaccaa on trono a la sèttimana, dopo avè
faa presonee on Papa e negaa Dio. Distrugeven altar, istituzion, robaven
a man salva statov, quader, manoscritt... e mi me par che basta per vèghen
ona pallida idea de la così dètta « furia francesa
». L’eterno tipo del Giovannin Bongee, scolpii dal Porta, el rappresenta
viv el sentiment e la ripugnanza per quij liberator spavald. Me permètti
de ripetov divèrs sèstinn del Giovannin Bongee che, anca
savèi a memoria, se senten semper volontera:
Vedi al ciar de la lampeda de straa A vegnimm a la contra on accident D’on cavion frances de quij dannaa, Che inscì ai curt el me dis: - Ett vò el marì De quella famm che sta dessora lì ?- Mi,muso duro tant e quant a lù Respondi: -Ovì, gè sui moà, perché Perchè, el repia, voter famm, monsù, L’è tre giolì sacre dioeu, e me piè. - giolì o no, ghe dighi, l’è la famm De moà de mi: coss’hal mò de cuntamm? Se che moà gè voeu coccè cont ell. - Coccè? Respondi, che coccè d’Egitt ? Ch’el vaga a fa coccè in San Rafaell Là l’è el loeugh de coccè s’el gh’ha el petitt. Chell vaga foeura di cojon de chi? No gh’è coccè che tegna: avè capi? - Cossa dianzen ghe salta,el dis: Coman? A moà cojon!... E el volza i man per damm. Ovèj, ch’el staga requi cont i man, ch’el varda el fatto sò de no toccamm, Se de no, dia ne libra, son capazz... E lù in quell menter mollem on scopazz. … E voeuna, e dò! Sangua de dì de nott! Che nol se slonga d’olter, che ghe doo! E lu sonnem de capp on scopellott: Vedi ch’el tend a spettasciamm el coo; E mi sott cont òn anem de leon; E lù, tonfeta! on olter scopazzon. |
|
tel.02 9837517 Melegnano Via Castellini, 27 |