Del poèta immortal, autor de la Ninètta del Verzee, de Giovanin Bongee, de la Nomina del Cappellan, del Miserere, mancaremm no de parlann a so temp. Adèss lassemeghel a la balia e poeu ai Gesuita de Monza perché l'abbia de studià filosofia in Seminari. E l'è staa el primm poèta milanes? No. Come poèta milanes el primm, almen in fatto de temp, credi, che'l sia staa Peder de Bescapè nassuu in la prima metaa del 1200 e poeu gh'è vegnuu adree Bonvesin de la Riva, Carlo Maria Maggi, nassuu in del 1630, e Domenegh BaIestrieri in del 1714, tegnuu in gran considerazion, e dopo tanti alter è vegnuu CarIo Porta. Dopo de lu, Giovann Ventura, el Giovann Rajberti, duu poèta de fagh tanto de cappèll e in del 1790 Tommaso Grossi diventaa l'amis indivisibil de Carlo Porta. Dopo la mort de Maria Teresa, moeur anca el cont de Firmian e el Cardinal Arcivèscov Pozzobonelli. EI primm el ven Sostituii dal cont di Wilzek e l'alter dal Monscior Filippo Visconti. E tutt quèst el succed in di ann 1782 e 1783. Giusèpp segond, tant in del 1784 come in del 1785, l'è vegnuu a Milan, da Vienna, dò volt, ma semper a l'improvvisa per vedè e toccà cont man i bisogn di milanes e anca per evità di accoglienz pompos che costaven semper danee. Intanta, el sètt de Marz del 1785 nass, in la penultima cà de via S. Damian, adree al navilii, prima de quèlla che fa angol per andà in via de la Passion, Alessandro Manzoni... e a di Alessandro Manzoni me par de di tutt. Tornèmm a Giusèpp segond. Risolutt de vorrè el ben del so popol el stabiliss cèrti rimedi e cèrti leg. L'ha comenciaa a mètt in tutt i cittaa e paes i so bravi scoeul normal gratuii, l'ha abolii el scior Senato, dopo tresent-novant ann de vita, per sostituill cont i so bravi Tribunai de Prima Istanza, d'Appèll, de Revision e de Commercio, cont on bravo codes che'I g'ha daa el tracoll al feudalismo. L'ha abolii assolutament la pèna de mort, l'ha faa on dazi unich e l'ha divis el staat de Milan in vott provinc. L'ha proibii la questua e per i mendicant l'ha faa di cà dove podeven trovà de lavorà, come al Ricover de S. Vìncenz, al Lazzarètt e a Biagrass. L'ha faa mètt a tucc i ca el so bravo numer de la porta, 
l'ha limitaa i sepoltur in di cimiteri... foeura di dazi e cioè in quèll de la Moiazza foeura de Porta Comasina, del Gentilin foeura de Porta Cines, quèll foeura de Porta Tosa, quèll de S.Gregori foeura de Porta Renza e quèll foeura de Porta Vercellina. L'ha vorsuu la libertaa dei culti, perchè ognun el doveva vedè e pensalla come ghe pareva e ghe piaseva. El bèll l'è che intanta che l'aveva istituii pussee d'ona catedra a Pavia per l'ammaestrament del clero, el ghe dava el rugh, come se dis, ai convent. Ve basta a di, che in tutta la monarchia, l'ha aboliì la bellèzza de 2165 convent cont 64.900 tra fra e monegh, senza cuntà poeu i confraternit, destinand i sostanz che gh'aveven, ai Curi... che ghe n'aveven no. Podii immaginass come se trovassen i fraa e i monegh, le figlie di Maria e i fioeu de Gesù!... e che qualitaa d'on pures el gh'aveva mèttuu in l'orèggia Giusèpp segond al Papa Pio sèst, el qual l'ha pensaa ben de tapascià subit a Vienna dove l'è staa ricevuu cont tucc i onor e l'ha poduu savè tucc i intenzion che'l gh'aveva el Giusèpp e tra vun e l'alter, dandegh ona botta al serc e ona botta al vassèll... hinn riussii a concilià on poo anca i interèss de la Cristianitaa. Giusèpp II, che cèrt avarii capii che l'era on alter S. Tomas che'l vorreva vedè tutt e in tutt cascià denter el nas, l'ha vorsuu che la spesa de la luminazion de la cittaa la se pagass cont la rendita del lott. Ma el lott el gh'era giamò? - Alterchè!... Se pò di che l'è nassuu in del 1448. Verament, propi el lott come lott el gh'era no, ma gh'era cèrti specie de lotterij che ghe diseven tontine. Intanta che Giusèpp segond l'andava adree a escogità tucc i mèzzi per la felicitaa del so popol, la tisi le minava e quèll bon omm che'l Verri l'ha battezzaa: Il giusto e l'amico degli uomini el moeur de consonzion el vint de Febbrar del 1790 a l'etaa de appèna quarantanoeuv ann... E l'è ben dolorosa! L'era on alter austriach che scompariva, ma vun che'l gh'aveva vorsuu tanto ben a Milan, e la cittadinanza sincerament addolorada l'ha piangiuu come per la mort de Maria Teresa. Leopold, fradèll del pover Giusèpp, che'l governava la Toscana, cont quèlla bontaa ereditada da soa mader Maria Teresa e che l'aveva faa de Firenze ona noeuva Atene, appèna el g'ha notizia de la mort de so fradèll el ghe lassa ai toscani so fioeu, Duca Ferdinand, e lu el va su'I trono de Germania propi in del moment che l'Europa la sent i primm scoss de la famosa rivoluzion francesa.