Computers
| Computers |
|
melegnano.net | |
 |
|
 |
| Gh’è staa anca fior de nobil milanes che faseven di bèi
oper de caritaa che se i lassassi in la pènna el saria on mal! E
siccome de mal su la coscienza voeùri minga vèghen, inscì,
tant per citann on quaivun, cominciaroo da Giovanni Ambrogio Melzi, perchè
l’ha lassaa di limosin de vitto e de vèstii annualment e di somm
minga indifferent per collocà i pover tosann onèst e levai
dai pericol. El cont Bartolomeo Arese l’ha faa ricostruì la gesa
de Santa Maria a la Porta su disègn de Francèsch Ricchini...
e podarià inscì seguità. Anca le belle arti fioriven
per merit de Cesare Dandolo, venezian, di duu fradèi Campi, dì
fradèi Procaccini, ma anmo pussee per Daniele Crespi e Francesco
Mazzucchelli de sangu lombard. E podaria nominann ona quantitaa. Ma quèll
che tegni a ricordà l’è el pader cappuccin, Giambattista
Aggiugari de Monza, al qual ghe devom i cappèll de la Madonna del
Mont de Vares. Sigura... propi a lu ghi devom! Dovii savè che, anticament,
esisteva ona specie de Santuari de la Beata Vergin, propi in scima come
adèss, ma gh’era minga i strad de andà su. El pader cappuccin
Giambattista Aggiugari, cont i so predich, l’è staa bon de tirà
su pussee d’on milion tra la popolazion de Vares, Gallaraa, Bust, Somma,
Carnagh e Caronn Ghiringhèll e subit l’ha spes per fa di bèi
strad, i cappèll e offrì quèlla magnifica passeggiada
da Vares a la Madonna del Mont, che l’è voeuna di pussee preferii
dai milanes. E l’è bèlla de bon!
Quanti milanes che ghe manca quatter e mèzz a fa cinqu sold e che, podend minga permèttess el lusso de fa el so mes de campagna, se limiten, ona quai fèsta ogni tant, a fa ona passeggiada fina a la prima Cappèlla e che stann là tutt el dì a respirà quèll’aria balsamica, che la Madonna la boffa giò senza economia! Ma ritornèmm a quèi car spagnoeu. Essend Carlo II senza fioeu, se comencia pensà a chi andarà a sèttass giò su’l trono de Spagna e, naturalment, salta foeura on bordèll de pretendent. El primm l’è Leopoldo I, capp de la famiglia imperial Austriaca de Germania, poeu ven el Delfino de Francia; perchè l’è fioeu maggior de la sorèlla de Carlo II. El tèrz l’è el Duca de Savoja e a fa el quart vegnaria el princip elettor de Baviera, parent per via de donn. A contentai tucc l’è minga ‘na roba facil!... Come se fa? Ma mai paura!... Quantunque el Re el sia ancamò viv, l’Inghilterra e l’Olanda se ciappen lor l’arbitrio de dagh: Spagna, India e Fiandra al princip de Baviera. I dò Sicilli ghii dann a Filippo d’Angiò, segond fioeu del Delfino, e Milan al segond fioeu de Leopoldo. Carlo II, vist che’l restava a momenti nanca padron... de l’appartament de foeura, el pensa ben de morì in del 1700, lassand erede Filippo d’Angiò. E chi, se ve fa nagott, finiss el domini spagnoeu in Milan dopo avè duraa la be]lèzza de centsessantacinqu ann. Ma fèmmes minga di illusion per l’amor del Signor! La famosa guèrra per la succession de Spagna, la porta per la quarta volta i frances a occupà Milan, ma gh’è minga de fassen meraviglia perché come v’hoo già ditt, i frances gh’aveven el bigliètt d’andata e ritorno. Però in del 1706 el princip Eugenio de Savoja, el ghe dà ‘na bona pèttenada ai frances attaccaa. a Turin e inscì è staa proclamaa noster Duca Carlo II come Re de Spagna e VI come Imperator, succeduu in del 1711 al fradèll Giusèpp I. Sotta Carlo VI la Lombardia l’ha veduu pù guèrr fina in del 1733, ma l’era come ghe fudèssen, perché i pover milanes doveven pagà i spes de quèi che faseven in di alter part de l’Impero. La guèrra de Guastalla, s’cioppada in del 1733, l’ha propi faa grattà in coo, come se dis. Figureves che i lombard se sarien mai specciaa de dovè vèrsà el so sangu per la Polonia! Roba de tra via el coo, ecco! Insci contra l’Imperator gh’è andaa la Spagna, la Francia e el Re noeuv de Sardegna; Carlo Emanuele, el qual Re, on poo tanto bellicos, el batt i Imperiaj e, come nagotta, el ven a impossessass de Milan. El domini l’è però minga staa longh perché l’è durà domà trii ann e cioè dal 1733 al 1736. Ma per quanto l’Imperator l’abbia tornaa a ciappà el Ducaa de Milan, l’ha dovuu tajaghen via on para de fètt, e cioè, el Tortones e part del Novares, assegnaa, durant el trattaa de paas, a Re Carlo Emannuèll. |
|
tel.02 9837517 Melegnano Via Castellini, 27 |