I affari de la casa Imperial par che vaghen minga tropp per la quale,
ma el Cardinal Flemy, primm minister de Francia, el propon a Vienna di
preliminari de paas che hann poeu portaa a la conclusion del trattaa de
Paris. Allora el tèrritori Milanes, tant per cambià e num
vèss mai padron de cà nostra, cont el Mantovan, el Parmigian
e el Piacentin, l’hann battèzzaa “ Lombardia Austriaca “ ... e lassa
che la vaga... che la va benone!.., Ven a governalla el general conte Otto
Ferdinando Traun. Carlo VI, l’aveva minga sbagliaa quattr’ann prima, a
fa riconoss a tucc i sovran d’Europa la “ pragmatica sanzione “e cioè,
che podeven benissim vèss erede imperial, minga domà i mas’c
ma anca i tosann che, segond lu, eren minga... i fioeu de la sèrva.
E l’è staa per quèll che Maria Teresa, l’unica tosa che gh’era
rèstaa a Carlo VI, dopo la mort de l’Arciduca Leopold, l’ha poduu
consèrvagh la Corona ai discendent di Habsbourg. Ma ciappèmm
minga la solita inviada... se no se salvom pù n’anca a piang! In
del 1712 gh’è andaa Arcivèscov Monscior Benedetto Erba, ciappand
el post che aveva lassaa el Cardinal Giuseppe Archinto. E l’è precisament
a l’Erba che ghe devom i ges de S. Bartolomeo, de S. Francesch de Paola
e de S. Peder Celestin. De governator g’hemm avuu, in del 1715, el conte
Luigi di Vendomo e in del 1717, quèll bon e bravo magistraa che
l’era el cont Girolom de Collaredo, del qual, ancamò incoeu, per
soa memoria è rèstaa i sbar del navilli, faa mètt
de lu, per la sicurezza di cittadin in del 1719. E chissà quanti
ciocch ghe sarann staa riconoscent... per vess minga borlaa in del navilli.
L’Imperator Carlo VI el moeur in del 1740 e siccome el gh’aveva minga de
mas’c, va su’l trono soa tosa Maria Teresa. L’era austriaca, l’è
vera... ma a Milan l’ha faa tanto ben e i milanes d’allora podeven basagh
la tèrra dove la mèttcva i pee e quèi d’incoeu deven
pronuncià el so nomm cont tutt el rispètt immaginabil. Quèll
de Maria Teresa se pò ciamall el temp di guèrr de succession,
tant è vera che appèna mèttuu in tèsta lee
la Corona che gh’aveva lassaa sò pader, Carlo VI, l’è stada
subit contrastada e per conseguenza tacca ona guèrra, ma propi de
quèi de maladètt, che pareva la dovèss finì
pù... e Milan el ghe borla ancamò in di man ai spagnoeu.
Ancamò ai spagnoeu?! Sì, ma stremives minga!... L’è
staa on domini ch’è passaa come... on temporal d’estaa. Appèna
Maria Teresa la s’è trovada Imperatrice e Regina, l’ha nominaa «co-reggente»
so marì, Francesch Steven, Gran Duca de Toscana ed ex Duca de Lorena.
Nass, in del 1741, e propi al tredes de Marz, l’erede dcsideraa e cioè,
l’Arciduca Giusèpp. L’Imperatrice l’ha vorruu ricev i omaggi di
divèrs staat, ma la s’è trovada contra i Elettor de Baviera,
de Sassonia cont el Re de Spagna. La Cort de Francia la ten i part del
Duca bavares Carlo Albèrt e la rièss a proclamall Imperator
cont el nomm de Carlo VII in del 1742. Vist el pericol, Maria Teresa, la
dimostra ona forza d’anim che difficilment se riscontra in d’ona donna.
La salven i so fedelissim Palatini d’Ungheria che aveven giuraa fedeltaa
a lee e al piccol Giusèpp, e per lee se arma anca l’Olanda e l’Inghilterra.
I Gallo-Ispani, guidaa da Francesch tèrz, Duca de Modena, dal generali
De Gages e dal maresciall Maillebois, parten dà Napoli e da la Provenza
e ajutaa dai Genoves, entren per forza in provincia d’Alessandria, Traun,
cont i Austro-Sardi, el corr per combatti, ma i vantagg ottegnuu dai Gallo-Ispani
mènen a Milan l’Infante Don Filipp, ma dopo trii mes ghe tocca fa
el ball del ritorno. L’era entraa, l’è vera, a Milan in pompa magna
el desnoeuv Dicember del 1745, ma l’hann spedii de nascondon la nott del
desdott Marz del 1746. E di che de quèll spagnoeu lì vorreven
fann on Duca de Milan! Bèll’affari che avarien faa! In di trii mes
che l’è staa chi no’l s’interessava che de teater, de fèst,
de baldori e de tutt el rèst... se ne lavava i man pussee che Pilatt.
Eppur hinn minga mancaa quij taj che, al floeu del Re Filipp g’hann
dèrvii i brasc. Ma ghe n’aveven minga avuu assee di spagnoeu?...
Per fortuna eren pocch e Maria Teresa l’ha poduu castigai tucc come se
meritaven. Moeur intanta Carlo VII al cinqu de Giugn del 1746 e Filipp
V el ghe va adree al dì noeuv d’Agost. Insci, l’incoronazion de
Francèsch I e la vittoria di Imperiaj a Piacenza, cambien on poo
i robb. De Gages e Maillebois ripassen i Alp in disordin e la Lombardia
l’è restituida al domini Austriach. Anca Genova l’ubbidiss a Maria
Teresa, ma on’ imprudenza del comandant general Botta Adorno, l’è
causa de l’ammutinament di cittadin e de la ritirada de la guarnigion alemanna.
Per vedè de ricuperà Genova, corr el Scoulemberg, el Braun
e el Pallavicino. La paas desiderada de tucc la ven conclusa a Aix-la-Chapelle
per cura dei minister Rietberg, conte de Kaunitz. E adèss se ve
fa nagotta, podom tirà on poo de fiaa, perchè de guèrr
per quarantott’ ann se ne parla pù, va ben? ? Sia lodato Iddio!.~.
Sì... e sempre sia!
L’è vera che se la guèrra ghe l’avevom pù in
cà nostra. ..la faseven i alter. .. e i spes mi faseven pagà
de nun!… E quèst per non famm pèrd l’abitudin, ma puttost
de vègh la guèrra e i spes… l’era mèi che andava a
l’infèrno domà i palanch. L’è vera o no? |
Computers
