| Intanta in mèzz a tucc stii bèi robb è tornaa
duu terribii flagèi... la pèste e la carestia. La poveraja
milanesa, ridotta a viv d'èrba, la se mètt a sacchèggia
i prestin. La sbatt giò la cà del vicari di provvigion e
la tenta de coppall! Ma subit, per mèzzo del Borromeo, la ven provveduda
de gran e raccolta in del Lazzarètt e in l'Ospedal de la Stèlla.
Ma la plebe la voeur minga sta sarada su... e la se sbanda propi in del
moment che i soldaa imperiai vegneven in Italia per la guèrra de
Mantova. Siccome per lor a vegni in Italia l'era come andà a trovà
la balia, se capiss che podeven minga vègnì giò cont
i man voeuj ! e difatti m'hann portaa... la pèste. I mìlanes,
ditta molto in confidenza, avarien preferii on quaicossa de mèi...
ma se sa... che a cavall donato... se ghe guarda minga in bocca.. - e dopo
tutt lor m'hann portaa giò... tutt quèll che podeven. La
pèste spantegada a pocch a pocch, l'è poeu s'cioppada spaventosament
in del Marz del 1630, al ponto che quèlla che gh'avevom avuu
cinquantaquatter' ann prima, l'era on biscottin in so confront. Podii immaginass
cont on Governo e on Senaa che vareven on figh, i alter autoritaa che varreven
ona svèrza e la popolazion diventada come inebetida e matta... Milan
l'era de paragonass a on gran foppon! Se stabiliss dè ritirà
tucc i appèstaa in del Lazzarètt dandegh el governo a on
cappuccin; ma anca lu, pover diavol, el gh'aveva minga tant de sta su allegher.
Sigura de no, perchè in del Lazzarètt gh'era domà...
quattordes mila appèstaa, dei quai ne moriva, in media, la bellèzza
de noeuvcent al dì... e scusee s'eren pocch! Hann poeu pensaa de
fa su di alter Lazzarètt provvisori. Durant el temp che la pèste
l’andava adree a ciappà pee e fa vittim a la pu bèlla, e
notee che l'è durada duu ann fasend 140.000 mort, aveven traa attorna
la vos che l'epidemia l'era causada da cèrti inguent e cèrti
onzion venefich! Se pò vèss pussee ignorant d'inscì?
Ma se quèi che casciaven attorna di robb simii eren bèsti,
pussee bèsti ancamò eren quèi che ghe credeven...
e che condannaven giò senza remission. Ve basta di che l'opinion
la s'era poeu radicada del tutt anca per on dispacc del Re Filippo IV,
col qual l'avvertiva el Governator de Milan de tegni i oeucc avèrt,
perchè da Madrid eren scappaa cèrti omen che gh'aveven di
inguent pèstifer. Se quèll pover Re l'era insci ignorant
de cred a di robb simil, el Tribunal de la Sanità de Milan, l'era
pussee stupid ancamò... parola d'onor! Appèna ricevuu el
dispacc, el Governator l'ha pubblicaa on decrètt che'l diseva: «
Che avendo alcuni scellerati ardito di ungere molte porte delle case, diversi
catenacci di esse e gran parte dei muri con unzioni, parte bianche e parte
gialle e dubitandosi che tali unzioni sieno state fatte per aumentar la
peste che va serpendo, si prometteva un premio di dugento scudi e l'impunità
a chi avesse denunziato i rèi )). Podii immaginaff come a tucc ghe
faseven gola i dusent scud! Gh'è de quèi che comencia a di
de avè veduu nientemen che'l Commissari stèss de la Sanitaa
a onsciscià port e cadenazz. Subit se arrèsta el Commissari,
on cèrto Guglielmo Piazza, e senza di nè vun nè duu,
el mètten a la tortura. Cont quèi argoment lì se schèrza
on accident, e tant per fa cèssà el torment el dis che l'inguent
ghe l'aveva daa el barbee Gian Giacom Mora... che, pover diavol, ne saveva...
come ne saveva el Piazza. La nanca fenii de pronuncià el nomm che
subit vann a arrèstall insèmma a di alter creduu so complic
e vègnen dichiaraa colpevol d’on delitt… ridicol. La Santa Inquisizion,
soo propi no perché la ciamassen Santa, come se la lavorass a cottim,
l’andava adree a torturà el Piazza e el Morra i quai, martirizzaa,
per mètt fin ai torment, se accusaven vun cont l’alter, inventand
robb de l’alter mond… e hann fenii col confèssà quasi de
vèss colpevol d’on delitt impossibil e che aveven mai commèsss.
La Santissima Inquisizion, persuasa ch’eren staa lor a onsciscià
port e cadenazz, dopo un poo de tregua, la ciappa quij duu pover disgraziaa,
je mètt su un carr e je porta al patibol.
El Piazza e el Morra durant la strada proeuven tutt i tortur: arrivaa in
piazza i metten su la roeuda, e i tègnen allegher con i tenaj rovent,
ghe rompen i oss, el taj de la man dèstra propi davanti a la bottega
del pover Morra barbee. Dopo i intreccen insèmma bèi e viv
e i tègnen alzaa de tèrra per ses or e dopo pensen ben de
scannai. Ma l’è minga nancamò finida, perché dopo
scannaa, hann decis de brusai e de sbatt la sènner in del navilli.
La cà del Morra la ven demolida e a l’istèss post è
staa inalzaa ona colonna ciamada “ La colonna infame “ cont l’assoluta
proibizion de fabbricà ancamò di cà in quell sit.
La cà del pover Morra l’era quèlla che faseva cantonada a
sinistra dal sbocch de via Vedra guardand el Cors de Porta Cines. La colonna
l’è stada sbattuda giò in del 1778 in sordina. Quèlla
Colonna inveci de tramandaa ai posteri…l’infamia del Morra e del Piazza
l’ha tramandaa quèlla del fanatismo religius, de la plebe e de l’ignoranza
in toga. Traa giò la Colonna s’è rifabricaa la cà
e de la creduda infamia gh’è rèstaa pù nanca l’ombra.
Del pover Morra è rimast la contrada a lu dedicada, propi lì
in facia a la Vedra e che la va da Porta Cines a via Cesare Correnti, ona
volta San Simon. Hinn minga pocch i milanes che inveci de ciamalla Via
Gian Giacomo Morra la ciamen via… Sant Giacom Morra. E g’hann minga tort
perché de vèss santificaa el meritaria. Stii bèi robb
succedeven sotta la cappa del ciel in del 1630.!
In del 1631 propi el vintun Settember, moeur l’Arcivèscov Federico
Borromeo che'l ven seppèllii in Domm in la tomba che se ved ancamò
incoeu taccaa l'altar de la Madonua de l'Alber.. I milanes hann piangiuu
tucc i so lagrim... come aveven piangiuu S. Carlo Borromeo. Duu esempi
de caritaa e de bontaa che hinn onor e gloria de Milan. Nè devom
dimenticà i duu dottor che curand minga la propria vita, disprèzzand
el pericol e sfidand la mort, eren semper al lètt di ammalaa e di
moribond, in di cà, in mèzz a la strada, in di Lazzarètt
e stii duu dottor, dègn de tutta l'ammirazion d'on popol, rispondeven
al nomm de Francesco Bossi e Lodovico Settala che, a l'or di sciori, preferiven
la benedizion di pover. Dopo la mort de Federico Borromeo è staa
faa Arcivèseov Cesare Monti che l'ha istituii el Seminari de Monza
e l'ha lassaa di magnifich quader a i'Arcivèscovaa. A proposit,
mi v'hoo daa Federico Borromeo come cusin de Carlo Borromco, menter inveci
gh'è tanti che disen che l'era nevod. Mi però sont staa cont
la maggioranza che le voeur cusin. In del 1652 è nominaa Arcivèscov
de Milan Alfonso Litta e mort lu ha ciappaa el so post, in del 1681, Federico
Visconti. Mort el Viscont va Arcivèscov, in del 1693, Federico Caccia,
che dopo ses ann el moeur per podè lassagh el post a Giuseppe Archinto
in del 1699. El Governo di Spagnoeu per Milan l'è staa on ver castigh
di Dio e tutt perchè eren ignorant come gabb e supcrstizios, come
del rèst avii veduu, in modo incredibil. Quèll de avè
trascuraa l'agricoltura, l'industria e el commercio che hinn la vita d'ona
nazion, se pò ben immaginà in che condizion el podeva trovass
stoo pover Milan che allora, come incoeu, l'è semper la barca di
mincion. La popolazion, che dusent ann prima l'era pussee de tresent mila
abitant, in del 1640, on poo per la carestia e on poo per la pèste,
la s'era ridotta a nanca cent mila! L'esèrcit spagnoeu l'andava
adree a fa guèrr e i pover milanes doveven paga i spes.
L'era comoda, èh? Ma pazienza avèssen avuu de veng! Lor ciappaven
su stangad sora stangad... e num pagavom el cunt. L'unica roba l'era de
dagh on taj de seguità a fa guèrra senza vun... che cuntass.
duu! Ma nanca per sogn! Insci el maresciall d'Harcourt el g'ha daa ona
tal mastegada al marches di Leganes governator de Milan, sotta Casal Monferraa,
de portagh via fina la cancelleria, l'argenteria, la cassa regia, i bagali
e tutt quèll che l'ha trovaa in del Camp de San Giorg. I Frances
e i Savojard, da vincitor, se avanzen e minaccen Milan... ma vist che stoo
pover Milan el mancava de tutt e gh'era minga tant de sta su allegher,
g'hann avuu la bona ispirazion de tornà indree. I milanes, consciaa
pussee anmò de San Quintin, hann dovuu ricorr, perchè levassen
i dazi, i diritti regali, che eren minga pocch, e proibissen la vendita
di fondi camerai. Se cambia i sonador... ma la sonada l'è semper
quèlla. Ven a governamm el marches de Caracena, on alter che andava
benonè! Siccome l'era on prepotent, el voeur tentà de desfescià
i frances da Casal, comenciand cont assalì el Duca de Modena. In
che epoca? In del 1652. Allora i Gallo-Estensi minaccen on'altra
volta Milan, incominciand a assedià Pavia. E ve disi la veritaa,
che se el Duca de Modena el rèstava minga ferii e se'l Princip Tommaso
de Savoja el se ammalava no, la cittaa l'avaria dovuu ced per forza! El
Duca Francesch, el ritorna in camp, el costring el Duca de Mantova a dichiarass
neutral e l'entra in tèrritori milanes... come on flagèll!
El romp l'argin de la Muzza, cont ona mina el manda peraria el sostègn
de la Martesana, lassand che l'acqua la vaga per so cunt, e cont el Duca
de Noailles el ciappa Mantova e Vigeven. El scior Caracena se l'è
meritada! Se va no a dissedà i can che dorma!... A mètt fin
ai continov vittori dei Gallo-Estensi ven la mort del Princip Modenes e
el so successor, Alfonso IV, che l'era pussee d'indol bona, l'ha
tegnuu la nautralitaa fina che la paas di Pirenèi l'ha pacificaa
la Francia cont la Spagna. Sèmm in del 1661 e i pover milanes poden
di de tirà on poo el fiaa. Ah, finalment! Sì... ma
fass minga di illusion! Ma hann minga nancamò finii de trebulà?
! Me spieghi... hoo ditt che i milanes podeven tirà on poo el fiaa...
perchè i maj portaa da la guèrra eren finii. E donca?
E donca... se i maj de la guèrra eren finii... rèstava semper
quèi procuraa dal cattiv governo. Per cittaven on alter de quij
car governator spagnoeu, ve nominaroo el Duca de Ossuna, el qual l'ha faa
la soa entrada in Milan cont ona tal pompa de no di. A la tèsta
del corteo gh'era divèrs compagnii de cavalier e cent cavaj carich
de roba e quattaa de scarlatt e or cont i cord de seda e or intrecciaa.
Ogni cavall el gh'aveva el so palafrenier vèstii in pompamagna Dedree
vègneva i carabinier, tucc in armadura, poeu tucc i nobil milanes
in gran gala. E, finalment, compar la carrozza del Duca, quattada d'or
e d'argent. Dedree poeu, come scorta, vègneva la guardia Svizzera,
la compagnia di lancer e di alter ancamò. E tutta quèlla
ricchèzza... la porta a Milan ona miseria d'inferno. El Duca, no'l
cercava che de fa su palanch e je faseva su in qualunque manera. Ne vorrii
on 'idea? All'Antonio Trotti el g'ha venduu el grado de general per vottanta
mila scud! Ve basta?... La Cort de Madrid, informada di bèi robb
che'l faseva el so rappresentant Duca de Ossuna, l'ha avvilii al ponto
de obbligall a toeugh el grado a dodes capitani che l'aveva creaa' lu.
Soo no, se levandegh el grado che'l gh'aveva venduu… a pronta cassa,
el gh'abbia anca daa indree i danee!... Ma g'hoo i mè rispèttiv
dubbi. Del rèst, credii minga che i governator spagnoèu a
Milan gh' avèssen stii gran poteri, o per mèi di ghe n'aveven...
o tropp o minga, e ve ne doo subit ona proeuva.Quand gh’è staa bastonaa
el can de la Principessa Triulz, lee, come v’ho già ditt, la faa
mazzà el colpevol dai so servidor e l’era logic, davanti a 'na roba
simil, che'l governator l'avèss subit de ordinà i'arrèst
di omicida per processai... ma la Principèssa, che l'era spagnoeula,
l'ha mandaa on correr a la Cort de Madrid e l'ha ottegnuu on ordin che
tucc i presonee dovèssen vèss rimandaa pussee che imprèssa
in casa Triulz e che'l governator l'andass a ciamagh scusa a la sciora
Principèssa. Capii quant eren i ur…? Se pò ben immaginass,
cont la giustizia... a base de raccomandazion, come i nobil alzaven su
la crèsta e i governator podeven minga cèrt mèttegh
on freno. I cittadin doveven fass compagnà per i strad da gent armaa
perché se rispettava pù. nanca el diritto delle genti.
El Resident del Gran Duca de Toscana, me l'hann ciappaa in pieno mezzogiorno
per fagh la pèll e portagh via quèll che'l gh'aveva, e se
l’ha poduu mèttes in salvo, ghe le dev a ona valida resistenza.
EI Governator cont el relativ Senato eren tant debol e tegnuu in considerazion
dal zero in giò che non hinn staa bon che de mètt foeura
stoo avvis « Chiunque suddito del Re Cattolico avesse in questa occasione
assistito il Residente sarebbe stato dalla Maestà Sua assai gradito”
E difatti el Resident se la poduu filà... senza avarij, ghe le dev
a on privaa qualunque, el marches Porrone, che l'ha faa scortà da
cent bravi di so fina a Piacenza. E serom in del 1656. El disordin l'era
tal de podè nanca descrivel. Per esempi, on cèrto Landriani
el mazza on cèrto Dell'Orto e per mèttes al sicùr
el va in gesa de S. Nazzar. EI Governator, Ponce de Leon, le fa giustament
tirà foeura de gesa dai so sbirr, ma l'Arcivèscov, Alfonso
Litta, eI va su tutt i furi, el dà foeura come on arian, el minaccia
interdizion, scomunich, ma el Governator el ten dur, rispondendegh che
se l'avèss scomunicaa l'avaria faa impiccà el Landrian su
la 'porta de l'arcivèscovaa! E' succèss on baccan indiavolaa
e non gh'è staa che'l president del Senato, Bartolomeo Arese, che'l
sia staa bon de fagh capì on poo la reson a l'Arcivescov. E sì
che l'era on Arcivèscov che l'ha faa del gran ben a Milan, perchè
quèll che gh'è de di... gh'è de di, come n'hann faa
tanto tucc i Arcivèscov vegnuu dopo Federico Borromeo. Gh'è
staa anca fior de nobil milanes che faseven di bèi oper de caritaa
che se i lassassi in la pènna el saria on mal! E siccome de mal
su la coscienza voeùri minga vèghen, inscì, tant per
citann on quaivun, cominciaroo da Giovanni Ambrogio Melzi, perchè
l'ha lassaa di limosin de vitto e de vèstii annualment e di somm
minga indifferent per collocà i pover tosann onèst e levai
dai pericol. |
Computers
