Computers
| Computers |
|
melegnano.net | |
 |
|
 |
| Me regordi de avè ditt che i spagnoeu aveven portaa nient
de bon. Confèssi de avè sbagliaa, perchè l'è
precisament da la Spagna ch'in vegnuu i fraa ospitalier de l'Ordin Giovanni
di Dio e che num ciamom Fate Bene Fratelli. E de lor, ancamò incoeu,
non se pò parlà che cont rispètt e cont grand riconoscenza.
Intanta i governator spagnoeu se succeden, via vun l'alter, che l'è
ona bellèzzà. El mort Marches d'Aymonte, l'è staa
sostituii cont el Duca de Terranova. Dopo de lu è vegnuu Juan Ferdinando
de Velasca, ma vun vareva l'alter. Vorrii save a che ponto l'arrivava l'etichètta
e la venerazion che ghe prèstaven? Ben, sentii quèsta ! Ona
sira on pover contadin el ved on paggio el qual, coinpagnaa da alter quatter,
el ghe portava de bev al fioeu del Marches d'Aymonte. A la vista del paggio
el se sbatt per tèrra, cont eI capèll in man, el se mètt
a piccass el stomegh... come al santus. Quaivun el g'ha domandaa el perchè
el se piccass el stomegh a quèlla manera lì, e lu el g'ha
rispost: Non volete che io adori ed onori iL Signore? Se capiss, come i
spagnoeu, vedend di stupid fina a quèll ponto, me vegnessen cont
i pee su'l coll! L'è vera o no? Se avèss de di che in st'epoca
chi gh'è di gran robb de cuntà su che riflètt la storia
de Milan, disaria ona bosia. I spagnoeu trattaven i milanes militarment
per conseguenza gh'era pocch de sta su allegher. Parlèmm poeu minga
de quèll che la sciora Cort de Madrid la ghe imponeva de pagà.
Roba impossibil de cred!... E per compens, la mandava a Milan di Governator
pien de boria e ignorant mè i boeu. L'industria, el commercio, l'agricoltura,
tutt era trascuraa. Insomma, quand se dis che i milanes eren tegnuu peg
di negher african e che fior de gent s'eren miss a fa l'assassin de mestee
come ona profession onorada, me par, s'è ditt tutt. Milan l'era
consciaa de sbatt via. El vizi e la congiura eren a l'ordin del giorno.
Gh'era pù nient de sacro e pù nissun gh'aveva paura de la
Giustizia che l'andava adree a fa lavorà la forca, la roeuda, i
roghi e i tenaj che l'era on piesè. L'è propi el caso de
di... che gh'era pù de religion. El Governator, Duca d'Ossuna, el
robava al gioeugh di miliaia de zecchin ai milanes e, minga assee de quèst,
el se mètteva in fond dei so scalon per podè brascià
e basà su i miee e i tosann di so invidaa. L'era on bèll
tipo o no? I cont Malaspina e Boschi mazzaven la gent che trovaven per
la strada per portagh via quèll che gh'aveven indoss, ma hann finii
cont el giontagh la tèsta. El marches Annibale Pòrrone ve'l
regali per turpitudin e libertinagg mist a crudeltà. La principèssa
Triulz l'ha faa mazzà in gesa, dai so palafrenier, on pover diavol
che'l gh'aveva battuu el so can, e tant lee che i palafrenier se la passen
liscia come on oli. Parlèmm poeu no di bravi i quai gh'era pù
nissun che je tegneva. El delitt l'imperava. Basta di che al procèss
sta faa a Battista Scorlino e compagn, è saltaa foeura che vun sol
de quij masnadier el gh'aveva su la coscienza la bellèzza de tresent
omicidi... e dico poco. In del 1595 ven faa Arcivèscov de Milan
Federico Borromeo cusin de S. Carlo. On cusin dègn de tanto cusin
per la soa gran bontaa. Ma de lu parlarèmm pussee avanti. A romp
on poo... diroo la monotonia, è vegnuu el magnifich ingrèss
de Margherita d'Austria, sposa a Filippo III, el trenta November del 1598
El Corpo Civico l'ha faa costruì per l'occasion, da l'architètt Martino Bassi, la Porta Romana che la gh'è ancamò incoeu. Gh'è andaa incontra a la Regina dusent giovinètt tucc vèstii, a spes de lor, de seda bianca e anca i scarp eren de pèll bianca per non fa, come se dis, on boeucc e on scarpon. La sposa l'era su na specie de portantina bianca, ma lee l'era vèstida in ner, perchè l'era ancamò in lutto per la mort de Filipp segond. El balducchin, tutt de seda d'argent e ricamaa d'or, l'era portaa dai Dottor del Colleg, vèstii de damasch fodraa de vellù e col capucc d'or! I milanes comenciaven allora a dass a la danza e l'aveven coltivada al ponto che i maèster de ball milanes se trovaven ai Cort de Roma, de Spagna, de Francia, de Savoja, de Polonia, d'Austria, de Lorena e via discorrend. Per conseguenza s'è daa on gran ball anca in onor de la sposa. In del 1599 se fa di alter fèst per l'entrada a Milan de l'Infanta Isabèlla, sposa a l'Arciduca Albèrt... e stèmm allegher che l'è istess. Al Governator, Don Luis de Requesens, è succeduu Don Peder Enriquez de Agevede cont de Fuentes. L'era on villan, a digh el so nomm, el faseva tutt quèll che’l vorreva, al ponto de fa condannà a la galera senza nanca rivolges al Senato. E notee che'l Senato el rappresentava el Re e quand gh'era de innoltrà ona quai supplica la se intèstava a « Maestà Vostra )) oppur « Potentissimo Re )). Ma lu se ne infischiava del mondo intero. E poeu el gh'aveva on alter bèll sistèma, quèll de dagh minga la paga ai impiegaa, e a quèi che ghe le dava, l'era... a titol de grazia. Robb adrittura che paren nanca vera, ecco! L'era poeu talment pocch ambizios, che'l vorreva lassà quaicossa a Milan che le ricordass in vita etèrna amen, e gh'è vegnuu in ment de fa el navilli de Pavia. Come idea l'era minga cèrt de sbatt via e subit i ingegnee Francèsch Romussi, Lissander Bisnati e Gabrio Busca s'hinn mèttuu adree, seguend i concètt del valentissim ingegnee Meda, ma se andava avanti a pass de formiga. Prima è cominciaa a tardà a vegnì i palanch, poeu hìnn vegnuu pù del tutt, e siccome a chii lavora se pò minga dagh i did in di oeucc, el gran navilli, da Milan a Pavia, el s'è fermaa… a la Conca Fallada. Ma lu, el loder, che'l vorreva la gloria a tutt i costi, el gh'avuu el coragg de mètt on'iscrizion che la diseva: « Con questa insigne opera le acque dei laghi Maggiore e di Como fin qui condotte, furono immesse nel Ticino e nel Po, fiumi irrigatorii e navigabili, onde ampliare con la facilità delle comunicazioni e del commercio la feracità e l'abbondanza dei campi, l'industria degli artefici e la ricchezza pubblica e privata ». Ghe voeur ona bèlla tolla o no? !... Ma se gh'era scavaa trè mia dal Laghètt la Conca Fallada... che acqua l'era che'l mandava in del Tesin e in del Po? !… In desnoeuv ann g'hemm avuu chi sètt Governator e in general eren de ciappà vun per batt l'alter. El Mendozza l'era minga el diavol, ma el Don Pedro de Toledo el gh'aveva, cont tanti alter bèi robb, quèll de vègh on cèrto numer de soldaa e pagai no, lassand però che se impattassen ruband a man salva tutt quèll che gh'aveven a portada de man. El Duca de Feria inveci l'aveva proibii l'esportazion di arma, dandegh insci el colp de grazia ai officinn de Milan e Pavia. Ma me n'hann faa del... gran ben i spagnoeu! Come hoo già ditt, se on Governator el varreva pocch... l'alter men ancamò. Intanta regnava in tucc la pussee grassa ignoranza e la superstizion fina al massimo grado. El Senato de Milan, de sta barbara ignoranza, ne dà ona magnifica proeuva, disend che mosso a compassion per la frequenza di striozz e tanti alter robb infernai che infèstava la cittaa... e relativ paesi circonvicini, el fa condannà a mort ona cèrta Caterina Medici, colpevol de vèss una femmina impurissima, stria e fattucchiera funestissima, avvelenatrice inumanissima che da quattordès ann la s'era dada al diavol e cont lu la frequentava l'inferno, che la gh'aveva relazion cont tucc i demoni, che je adorava e che cont lor la mangiava e la ballava! El Senaa la consegna a l'Inquisizion e l'inquisitor la riconsegna al Capitani de Giustizia e per so ordin, ornada de figur diabolich, la vén portada al patibol su on carr e strada facendo, tant per tegnilla su viscora, la tormenten coi tenaj de foeugh e per ultim poeu la brusen. Notee che sta povèra disgraziada l'era la cameriera del senator Melzi che i dottor, essend minga staa bon de guarill d'on dolor che'l gh'aveva al stomegh, aveven dichiaraa che l'era striaa de lee e che sotta ai cossin aveven trovaa di pènn intrecciaa insèmma a di tocchèi de lègn che dal prevost de S. Giovann Lateran eren staa giudicaa roba de stregoneria diabolica. La cameriera l'era stada anca esaminada dal prevost stèss che l'aveva fada distend per tèrra e dopo vègh mèttuu on pee su'l coll, el gh'aveva vist di maggètt negher su la s' cièna e subit l’ ha dichiaraa... impront del diavol. Ma minga assee del Senaa e del prevost, gh'era anca on cèrto Vacallo che'l se diseva anca lu striaa da quèlla donna perchè l'era, de lee, innamoraa come on gatt sorian! Che temp magnifich... quèll di spagnoeu! . . E che santi minister di Dio... che gh'era! In mèzz a tutt stoo luridumm, per fortuna, g'hemm avuu on Federico Borromeo che in di so trentases ann de arcivèscovaa l'ha faa tanto ma tanto ben a Milan. Intanta ghe devom a lu l'Ambrosiana, che l'è ona biblioteca de fagh tant de cappèll perchè oltre ai manoscritt rarissim e oper de gran valor raccolt in tutt i part del mond e avègh assegnaa òna dote a la biblioteca, el gh'aveva taccaà on colleg de Dottor, on moseo de storia natural, on'accademia de belle arti e ona tipografia. Sta gran Biblioteca, costruida in ses ann, da l'architètt Manzone, l'è stada avèrta al pubblich in del 1609. Federico Borromeo l'avaria poduu mèttegh el so nomm che'l saria anca staa ben mèss, ma modèst come l'era el g'ha mèttuu quèll del Sant titolar de la gesa de Milan e cioè S. Ambroeus... ciamandela Ambrosiana. A lu ghe devom anca la gesa de S. Giusèpp, in la via che la portava l'istèss nom, incoeu battezzada via Giuseppe Verdi... ma che on quai mìlanes le ciama... via S. Giuseppe Verdi! Federico Borromeo l'ha faa ricostruì la gesa de S. Steven, l'ha istituii el convent dei Carmelitani Scalzi e quèll de Filippo Neri. E va minga dimenticaa la bèllissima e ricca gesa de S.Alessander cont i scoeul Arcimboldi, anca per i mezzi che ghe vegneva da Monscior Arcimboldi, cerich de camera del Papa Clement VIII. Ghe devom anca Santa Maria Podon e anca part di Portegh de l'Ospedal Maggior, arricchii dal Giampeder Carcan, el fondator d'on convent de vergin che ghe diseven i Carcaninn. El saria poeu on mal a dimenticà cèrti dottor de l'Ambrosiana come l'Antoni Gigeo e Paolo Frisi. Fra i artista, semper de l'Ambrosiana, bisogna regordà Giovann Battista Crespi, de soranomm Cerano, che l'è poeu quèll che ha faa el San Carlon d'Arona alt trentases brazza, e l'Andrea Biffi che l'ha scolpii la gran statoa de Filipp segond, destinada in del 1796 à vèss trasformada in Bruto e de vèss trada a tocch poeu in del 1800 da la plebaja milanesa e spantegada in mèzz ai immondizi. Eppur el Borromeo se’l gh'aveva de lottà cont quaighedun... l'era coi pret. - Oeuh, dèss!... Cont i pret? - Propi cont lor! Figureves che pretendeven de vèss esoneràa de tutt i gabèll, de tutt i tass e che vègnessen faa pagaa tucc dai laici. Eren de cattà o no? - Alter che de cattà!... L'era ona presunzion de salvass senza merit! - Ecco... ma malgrado quèst, i sciori pret, tegneven dùr e se refudaven de impartì i sacrament e intanta eren continov discordi. El Governator, Duca di Feria, l'ha portaa la roba davanti al Senaa che l'ha mandaa subit a Roma Giambattista Visconti. El va el Viscont a Roma, ma on poo la Cort Pontificia, on poo i intrigh del Nunzio Apostòlich de Madrid... fatto sta che hann conclus on bèll nagotta! |
|
tel.02 9837517 Melegnano Via Castellini, 27 |