Mort Francesco Sforza II in del 1535, come hoo già ditt,
Antonio de Leyva el ciappa possèss del staat de Milan in nomm
de Carlo V e dopo divèrs tentativ e progètt el Ducaa de Milan
el passa in di man difinitivament ai Spagnoeu. Milan el g'ha pù
on princip sò, el pèrd ogni influenza politica e, ligaa man
e pee, come ona piccola cittadèlla de provincia, el ven traa insèmma
al grand Impero Spagnoeu. El Re de Francia el vedeva de mal oeucc Carlo
V come padron de Milan e l'andava adree a insist perchè el Ducaa
de Milan el ghe vegnèss daa al so segond fioeu che l'era poeu el
Duca d'Orleans e che' l discendeva da Valentina Visconti per via de Claudia
soa mader. Ma l'Imperator Carlo V se ne infischia de la sciora Valentina
e de la Sciora Claudia; el lassa che l'Orleans el discenda da dove el voeur
lu, el va adree a toeu in gir el Re di frances, ma el Ducaa de Milan le
molla on accident. El Re, che l'ha capii l'antifona e stuff de vèss
menaa per el nas, in del 1536 el manda el so esèrcit in Piemont,
e '1 s'impadroniss de tutt, fina a la Sesia. Carlo V, vist inscì,
el se moeuv lu e el rièss a cascià foeura d'Italia i frances.
In quèlla guèrra moeur Antonio de Leyva, e al so post ghe
va el marches del Vasto, don Alfonso d'Aroios. Francesco I el manda duu
ambasciator, vun a Venezia e l'alter a Constantinopoli, ma el marches del
Vasto mi je fa ciappà su'l Po, vesin a la foce del Tesin,
e mi je fa massacrà tucc e duu, per podè andà in possèss
di cart che avarien dovuu vègh, ma l'è rèstaa
scornaa perchè i cart. eren già staa spedii prima a la soa
destinazion. Quij duu delitt hann faa andà in bèstia, e cont
reson, el Re de Francia che, cont el so esèrcit, comandaa da Francesch
Borbon cont d'Enguien, el ghe dà ona bona pèttenada a l'esercit
Imperial comandaa dal stèss marches del Vasto, a Cerisola, el quattordes
April 1544 Cèrt el Borbon l'avaria invas anca el Milanes se la paas
de Crespy la gh’avèss minga impost la fin di ostilitaa. In
quèll trattaa, era staa stabilii che l'Imperator el gh'avaria daa
per miee al Duca d'Orleans o la soa tosa Maria cont la dota de la Fiandra,
o la tosa de so fradèll Ferdinand, cont el Ducaa de Milan per dota.
El Duca d'Orleans el g'ha minga rispost: quèsta o quèlla
per me pari sono, ma di dò l'ha scèlt la segonda, minga perchè
la fudèss la pussee bèlla, ma perchè la ghe portava,
come se dis, el Ducaa de Milan in del scossaa. Ma el matrimoni el s'è
poeu minga effettuaa, per la semplice reson che al Duca d'Orleans ghe vegnuu
in ment de morì quasi subit, malgrado el fuss giovanissim. L'imperator
allora l'ha pensaa ben de invèstì subit del Ducaa de Milan
el so fioeu Don Filipp. Intanta, al vundes de Marz del 1544, nass a Sorrento
Torquato Tasso. Moeur, in del Marz del 1546, a Vigeven, el Marches del
Vasto, per lassagh el post a don Ferrante Gonzaga e cont lu, se Dio voeur,
g'hemm a che fa cont on galantomm! L'è a lu che Milan el ghe dev
i bastion che in part se veden ancamò incoeu e che hann unii a la
cittaa tutt i borgh, perchè come savii, la cinta de Milan, quand
l'hann slargada per la segonda volta, l'andava domà fina al navilli.
Quand el Gonzaga el doveva ricev in Milan el princip don Filipp, el dava
l’ordin de mètt la cittaa in condizion de podè ricevel ben
e Filipp, per riconoscenza vèrs i milanes per tucc i attenzion e
gentilèzz che ghe usaven, el vorreva regalagh la... Santa Inquisizion.
I milanes s'hinn oppost in d'ona manera insci energica che Filipp
l'ha miss la bèrta in sen... e se n'è parlaa pù. Non
mancava propi che la Santa Inquisizion, per completà l'opera! El
Gonzaga l'aveva faa sgrandì la Piàzza del Domm fasend sbatt
giò la gesa vèggia de S. Tecla estiva e sbatt giò
tanti poggioeu de lègn e cèrti tècc che faseven schivi.
Quaivun vorreva sbatt giò anca i Colonn de S. Lorenz, ma el Gonzaga
l'ha minga vorruu assolutament. Appèna che Don Filipp el lassa Milan,
per andà a Bruxelles a trovà so pader, el Gonzaga cont la
soa brava truppa el va per assaltà Parma e per strada el comencia
a impadroniss de Brescèll e Colorno. Intanta ven tragicament mazzaa
el Duca Pier Luigi Farnese, nevod del Papa Paolo III, el qual vedend, dopo
la mort de so nevod, che i Imperiaj aveven occupaa Piacenza, el fa Lega
cont Enrico II che l'era el successor, in del reamm de Francia, de Francesch
I. Ma el Papa Giulio III che l'era succeduu a Paol III, el se dichiara
nemis del Re de Francia e el se uniss a l'Imperator. Insci tacchen ona
guèrra tal, che per l'Imperator l'è stada on ver disaster.
Ven ciamaa da la Toscana el famoso Gian Giacomo de'
Medici, marches de Marignano, incoeu Melegnan, per mèttel a
la tèsta de l'esèrcit, ma anca a lu ghe ven la malinconica
idea de andà al mond de là e nissun è staa bon de
fagh cambià parer, tant è vera che'l moeur el vott de November
del 1555. Gian Giacom l'era, come hoo già
ditt, milanes puro sangue e fioeu de Bernardo de Medici e de Cecilia Serbelloni.
I milanes g'hann faa l'onor de seppelill in Domm, in ona magnifica tomba
disegnada da Michelangiol, che la se ved ancamò incoeu e che segond
el Vasari la saria stada fada da Leone Aretino che l'ha finida in del 1564
e ghe l'hann pagada 7800 scud d'or. I ses colonn che se ved sarien staa
regalaa da Pio IV. Finalment tutt i potentaa
combinen ona tregua a Cambrai. Carlo V el ced el trono al so fioeu Filipp
II e lu l'entra in d'on convent in Spagna. Intanta Milan el va adree a
abbèlliss. El genoves Tommaso Marino el fa su quèll pò
pò de Palazz in prèja che incoeu l'è sede del Monicipi,
su disègn de l'architètt Galeazzo Alessi da Perugia. In del
1564 el Re de Francia l'ordina che l'ann l'abbia de comencià al
primm de Gennar e pù a Pasqua.
In l'istèss ann nass, a Pisa, Galileo Galiei e propi el desdott
de Febbrar che l'è el dì che moeur Michelangiol. A stoo mond
l'è inscì, chii va e chii ven. |
Computers
