| Giovann Viscont l'ha poduu god pocch de la vittoria perchè
l'è mort in del 1354 lassand la Signoria ai trii nevod, che se l'hann
divisa inscì: al Matteo, che l'era el primm, gh'è toccaa:
Lod, Piacenza, Parma, Bologna e Bobbi; a Bernabò: Bergom, Brescia,
Crema e Cremona; e a Galeazz: Comm, Novara, Vercelli, Asti, Alba, Alessandria
e Tortona. Milan e Genova eren però soggètt a tucc e trii,
staa riconossuu vicari imperiali da Carlo IX° incoronaa a Milan, da
dove però l'è filaa pussee che imprèssa per el spavent
che l'ha ciappaa quand l'ha vist l'enorme milizia di Viscont. Se avègh
on soci l'è già ona roba difficil andà d'accord, disi
poeu mi avèghen duu! Per conseguenza el triumvirato l'è duraa
pocch. Matteo l'ha comenciaa a pèrd Bologna che la gh'è andada
in di man a Giovanni Visconti da Oleggio. Matteo el gh'era on poo in sui
crost a Galeazzo II° ed a Bernabò, e siccome, salvo eccezion,
l'è giust el provèrbi: amor de fradèll amor de cortèll,
lor, da buoni fratelli, eren pront a mazzass vun cont l'alter. Matteo el
moeur on ann dopo a Monza, e cioè el vintinoeuv Settember 1355.
Se la vita scioperada che'l faseva Matteo l'è stada la causa de
la soa mort, se pò però minga esclud che i so duu fradèi,
semper per el gran ben che se vorreven, l'abbien àjutaà andà
al mond de là cont del velèn. L'era forsi ancamò cald
el Matteo, che i alter duu s'hinn divis subit l'ereditaa. A Bernabò
gh'è toccaa: Bergom, Brescia, Cremona, Lod, Crèma, Soncin,
Valcamonica, la Riviera del Garda i castèi de Caravagg e Vaprio;
a Galeazz inveci: Comm, Alessandria, Tortona, Vigeven, Asti, Bobbi, Piacenza,
Monza e col temp anca Pavia. E' rèstaa ancamò in societaa
Genova e Milan. Genova, però, ghe l'hann avuda per pocch, perchè
i genoves, che di Viscont ghe n' aveven pien i scatol, s'hinn ribèllaa
e hann elegiuu a Doge Simon Boccanegra. I Viscont, credendes i padron del
mond, vorreven fagh guèrra a tucc, inscì i hann ciappaa su
a Pavia difesa dal Marches del Monferraa, dal Conte Lando, che l'era el
capp d'ona banda de masnadieri e da la grand'eloquenza del fraa Jacopo
Bussolari che, pover diavol, l'ha finii su'l patibol. In quattr'ann la
cittaa l'è stada ciappada e pèrsa quatter volt, fina che
el Lando e i Beccaria, padron de mèzz Pavia, s'hinn lassaa corromp
dai palanch e Galeazz el se sètta giò de padron in del 1357.
Appèna in possèss de Pavia, Galeazz el compra, l'è
la parola, la man de Isabèlla per so fioeu, tosa del Re de Francia,
Giovanni II° di Valois, che'l ghe dà in dota la Contea di Vertus
in Sciampagna e al gèner Gian Galeazzo el ghe assegna el titol de
Conte di Virtù. Galeazz, per non pèrd l'abitudin, l'era semper
in guèrra cont tucc e specialment cont el Marches del Monferraa,
mandand inscì in ruvina la Lombardia. Basta di che in voeuna de
stii guèrr, el Marches del Monferraa l'aveva miss al soldo la così
dètta “Compagnia Bianca”, composta da masnadier ingles, normanni,
borgognoni, tedèsch e spagnoeu che dove toccaven taccaven, come
se dis, portand de per tutt strage, devastazion e la pèstilenza
per gionta e hinn mingà ball, perchè in del 1361, domà
Milan l'ha sottèrraa la bellèzza de settantases mila
mort. St'ultima guèrra l'è finida in del 1364 per vèsses
miss de mèzz l'Imperator Carlo IV° e i Re de Ungheria e de Francia.
Pandolfo Malatesta, Lucchino Dal Verme, Giovanni Caimi e l'ingles Aucud
eren i capitani de ventura al soldo de Galeazz. Se Galeazz l'era
on tiranno, on omm senza coeur, capace de tutt fasend soffrì i pover
milanes cont el soffegai de tass e gabèll per podè fa su
palanch, Bernabò l'era el so dègn fradèll. Intanta
che a Milan regnava la pèstilenza, lu se ne stava tranquill come
on papa in del so castèll de Marignano. On bèll dì
andand a caccia, el troeuva su'l pont del Lamber duu fraa mandaa dal Papa
el qual, giustament, ghe l'aveva su cont i duu Viscont e cont Bernabò
pussee ammò, per tutt i infamitaa che commètteven. I duu
fraa el fermen, e ghe consegnen la pergamena che'l Papa el ghe indirizzava.
Bernabò el ghe dà ona oggiada e vist i rimprover e i minacc
de Innocenzo VI° el se volta ai duu pover fraa cont cèrti oeucc
e ona faccia de fa paura, el ghe domanda, mostrandegh la pergamena, se
gh' aveven famm, e l'acqua del Lamber se gh'aveven set! Per falla curta,
ve disaroo che quij pover duu fraa hann dovuu, se vorreven minga finì
in del Lamber, mangiass la pergamena, la bolla de'piomb che gh'era taccaa
e anca i so duu bravi cordonitt de seda che la tegneven ligada. Vun de
quij fraa, l'era Guglielmo da Grimvaldo de Marsiglia, staa poeu faa Papa,
cont el nomm de Urbano V°. Se pò immaginass, come l’infamia
de Bernabò, se l'avèss ligada al dit. Se capiss come cèrti
robb se poda minga perdonai nanca vèss Papa. Galeazz, semper per
acquistass... simpatia e benevolenza, je pensava de nott per fai del dì,
infatti l'ha creduu ben de inventà on supplizi noeuv tant per tegnì
su on poo allegher la gent, ciamaa poeu: Quaresima de Galeazz. Credi che
infamia ,pusseè de quèsta l'avaria minga poduu pensà
el peggior tiranno. L'era on supplizi che' durava quaranta dì...
e scusee se l'è pocch. El primm dì se ghe dava al condanaa
cinqu còlp de corda, el segond dì el se lassava riposà,
per podè, al tèrz, tajagh via i orègg, on alter dì
se ghe cavava on oeucc, el dì dopo l'alter, poeu se ghe tajava la
man dèstra, dopo la sinistra e via via per quaranta dì. Roba
addirittura de fa vegnì su la pèll d'oca. Se Dio voeur Galeazz
el crèppa el quatter Agost del 1378 in del castèll de Pavia.
Sperèmm che'l Signor ghi abbia faa pagà tucc carna salada.
Però Pavia la ghe dev al gran interessament de Galeazz se l’ha ottegnuu
da l'Imperator Carlo IV° on diploma in data tredes April 1361 col qual
se creaven, oltra a quèlla de Diritto che ghe l'aveva già,
alter Facoltà noeuv e per l'Universitaa de Pavia, stada fondada
in del 825 da Re Lotario, l'era minga ona roba de nagotta. L'era la vita
d'ona cittaa perchè Galeazz l'aveva miss l'obbligh a tucc i student
del so domini che i studi dovèssen fai a Pàvia. |
Computers
