| El ciappa el post del Galeazz so fioeu, Gian Galeazz Conte di Virtù,
che essend rèstaa vedov de Isabèlla, el sposa soa cusina
Caterina, tosa del Bernabò e de la Regina de la Scala. Gian Galeazz
l'era on furbon matricolaa, el faseva, come se dis, la moneghèlla
falsa, on ver basapili, semper coi oeucc rivolt al ciel e i man in l'acqua
santa, el cantava in di cori coi fraa, el vèstiva modèstament,
el faseva di gran caritaa, el mortificava el corp, ma tutt per tirà
l'acqua al so mulin... e come l'ha savuu tiralla ben! El popol l’ha creduu
nientemen che on sant tant l'è staa bon de fa el gesuita e dagh
a tucc el fumm in di oeucc. Ajutà el succèss del nevod, l'è
staa el zio, perché intanta che Gian Galeazz el cantava in di còri,
Bernabò el seguitava, per nagòtta, a fa torturà, mètt
al rogo o sarà in di gabbi de fèrr in compagnia di cinghiai
rabbios o avvelenaa... e via discorrend, tucc quij pover crist che ghe
borlava in di ong. Andand avanti vedarèmm che anca el nevod l'è
dègn del zio. Bernabò Viscont, che l'era l'omm pussee discol,
intemperant, cattiv e sfacciaa che ghe fuss staa su la madre tèrra,
el gh'aveva ona passion matta per la caccia e per conseguenza el gh'aveva
i so sit de caccia riservada. Se on quaivun el gh'avèss mazzaa ona
legora o ona quaja, quèll l'era sicur, pover diavol, de andà
drizz su la forca e tutt i beni, se ghe n'aveva, eren confiscaa. A differenza
di alter cacciator inveci de duu o trii can, lu ghe n'aveva la bellèzza
de cinqu mila e je tegneva part in S. Giovanni in Conca, in la così
dètta cà di can, e part in campagna e quij pover diavol che
ghe vegneven daa in custodia doveven viv semper cont la tremarèlla
adoss. Sì perchè se on can el diventava, magher la colpa
l'era del custod, el qual senza tanti compiiment l'era spogliaa de tutt;
viceversa, se'l can el vegneva via polit, el custod el gh'aveva el toeu
e poeu toeu. E guai se quaigheduu vorrevà mètt denter el
nas... Basta di che duu pover Francescan che s'eren permèss de digh
a Bernabò de vess on poo pussee uman, lu i ha faa subit brusà
viv. El bèll l'è che'l se ostinava a di che lu l'era el cristian
pussee divot! L'è vera che'l faseva dì di mèss che
lu el sentiva immancabilment, ma in l'istèss temp l'insultava el
Papa, i Vèscov e i pret le mètteva sotta ai pee adrittura.
Ai convent el ghe dava di beni, sì... ma eren quèi che lu
el confiscava ai alter però! In del 1384 moeur Regina de la Scala,
miee del Bernabò, l'unica che gh'aveva su de lu on poo diroo così
d'impero, e che l'era bona de calmà on ciccinin i so impeti de collera.
Guai se la fuss stada voeuna de 'soffià su'l foeugh' inveci de mètt
acqua! Se a Bernabò ghe sia dispiasuu de la mort de soa miee o se
inveci el fuss content per avègh pù chii cercava de mèttegh
on quai freno ai sò birbonad, mi savaria minga divel. I milanes,
de sta principèssa, g'hann ona memoria in del Teater de la Scala
che'l porta el so nomm e per vèss staa fabbricaò propi in
del post dove gh'era la gesa de S. Maria de la Scala fondada e dotada da
lee. Ma del Teater de la Scala me risèrvi de parlaven pussee avanti.
Gian Galeazz, come hoo già ditt, l'era on finton de prima forza
e se ne stava a Pavia cercand la manera de vègh in di sciamp tutt
el Staat. El fing on viagg a la Madonna del Mont, che, come tucc sèmm,
l'è visin a Vares per fa on voto e de bon nevod, l'avvèrt
el zio Bernabò, scusandes che per la prèssa el podeva minga
vegnì in cittaa a saludall, ma che l'avaria veduu inscì tanto
volontera se'l gh'aveva la bontaa de trovass, ven stabilii el sit dove
poden vedèss. Infàtti la mattina fissada, Gian Galeazz el
ven a Porta Cines cont on gran seguit de gent armada e par che'l voeubbia
dislenguà da la consolazion quand el ved e vegnigh incontra duu,
fioeu del Bernabò mandaa dai pader che, a cavall d'ona mula e scortaa
da dò guardi del so seguit, le spècciava su'l pont de S.
Vittor. Appèna s'hinn vist gh’era pù nissun che je tegneva.
Brascia su de chi, basa su de la... insomma ona roba commovent, ma dopo
tutt i salamelècch, Gian Galeazz el ghe dà l'ordin in tedesch
a duu so ufficiai, de arrèstà el zio. Ditt e fatt, circonden
Bernabò e i so fioeu, i disarmen, e faa presonee vègnen,
pussee che imprèssa, portaa al Castèll de Porta Giovia, intanta
che Bernabò e i so fioeu dann foeura de maladètt, minacciand
e vosand al tradiment. Gian Galeazz se ne infischia, el lassa che vosen
e strillen e content come 'na Pasqua che'l colp l'era andaa ben, l'entra
trionfalment in Milan fra i evviva del popol che l'acclama Signore Generale.
Ai alter fioeu de Bernabò non ghe rèstava che cercà
de mèttes al sicur e g’hinn riussii. Mèttuu a post Bernabò,
Gian Galeazz, el permètt che se saccheggia i palazz del zio dove
gh'era raccolt ona gran quantitaa de ricchèzz e in l'istèss
temp ghe se arrend el Castèll de S. Nazzar e la torr de Porta Romana.
Gian Galeazz, fint semper pussee de Giuda, el mandà a tutt i cort
di regnant on manifèst, corredaa da cèrti procèss
fals, dove se descriveva tutt i balossad de Bernabò e di so fioeu,
aggiungend che'l tradii l'era staa lu e minga el Bernabò e che se
l'aveva faa presonee so zio e i cusin, l'è staa per la soa difesa
personal, perchè ghe l'aveven giurada. Bernabò l'è
poeu staa mandaa al Castèll de Trèzz, sta faa fabbricaa propi
da lu, e che mai pù el se saria immaginaa c'he on bèll dì
l'avarien saraa denter lu per fagh espià i so pèccaa. Bernabò
el moeur, tant per cambià, anca lu avvelenaa a settantases ann,
in del 1385, lassand indree la bellèzza de trentases fioeu tra legittim
e naturai. Se pò immaginà el... dolor de quèll car
nevodin, che l'ha piangiuu la mort de so zio come pocch nevod piangen.
El g'ha faa di funerai straordinari e la faa mètt in dona tomba
de marmo in gesa de S. Giovann in Conca. Quanta bontaa d'anim! . -. E che
coeur... el gh'aveva quèll Gian Galeazzo Visconti!... La soa potenza
e la soa politica. g'hann assicuraa, minga domà quèll che'l
gh'aveva giamò, ma ghe l'hann ingrandii e aumentaa. Scommètti
che tanti se domandarann come mai tanti princip che hann sposaa i tosann
de Bernabò hinn minga staa bon de uniss ai fioeu e andà contra
al Gian Gaieazz e fagh pagà car quèll vil tradiment? Hann
minga mancaa de fall, ma santo Dio!... se trattava, dopo tutt, de vendicà
on tiranno de la peggior specie e che la soa mort la' ghe permètteva
a tucc de tirà el fiaa! L'era anca giusta che se la ciappassen minga
calda! E Gian Galeazz, cont la soa arte raffinada de fing, el saveva
conquistass i simpatij de la popolazion; l'ha subit diminuì i gabèll,
el g'ha ridaa i privileg che Bernabò el gh'aveva tolt, l'ha tiraa
via tutt i abusi e l'amministrava anca cont ona cèrta giustizia
e imparzialitaa. Cèrt, che l'era ambiziosissim e che'l ghe tegneva
molto a l'immortalitaa, e a provall bastaria el Domm de Milan e, la Certosa
de Pavia che lu l'ha ordinaa de erig in del 1386. Per quèll che
riguarda el Domm, ghe nè de quèi che... tra'l sì el
no... hinn de parer contrari. Ma ne parlarèmm dopo. Continoa però
i guèrr e semper per la sfrenada ambizion de Gian Galeazz. In del
1387 el fa alleanza coi Da Carrara e cont i Signori de Padova per andà
contra al Signore de Verona che'l ven sconfitt, rèstand a Gian Galeazz
i so domini che pèrò el doveva spartì coi Da Carrara
che, giustament, pretendeven la soa part, come era staa stabilii; ma Gian
Galeazz el ghe dà nanca a trà, e siccome el vègg Da'
Carrara l'andava adree a alzà la vos, le ciappa e le fa mètt
in del Forno de Monza e le lassa crèppà. El gh'aveva on gran
bon coeur anca lu, vedii! In del 1389, l'unica tosa de Gian Galeazz, Valentina,
la va in, Francia, sposa al fradèll de quèll Re là,
cont ona dote che non ve soo di e per gionta el ghe dà anca la cittaa
de Asti e alter tèrr e castèi del Piemont. Ma el pussee content
de tucc l'è staa el popol che l'ha dovuu pensà lu a fa i
spes del matrimoni. Inscì Gian Galeazz el gh'aveva daa ai frances
la ciav per podè dèrvì la porta e vegnì in
cà nostra. E quèlla porta la ven infatti dèrvida in
del 1391 dal Cont de Armagnac, parent de Bernabò, che cont di forz
considerevol el ven a fagh la guèrra a Gian Galeazz, el qual el
comencia a sentiss a tremà el bamborin. A tirall foeura d'imbarazz
ghe pensa Jacopo Dal Verme, on capitani coi fiocch, che cont ona bona scorta
el va in Alessandria a spèttà che vègna el scior Armagnac
per tajagh la strada. El ven, el scior Armagnac, e siccome i frances hinn
semper staa fanfaroni e spavald come fussen staa lor a inventà el
fumm de ras, appèna l'entra in Alessandria coi so soldaa e smontaa
de cavall, tucc se mètten a vosà: Foeura! Foeura, lombardi
vigliacchi! E siccome i lombardi hinn mai staa vigliacchi ai so dì
hinn vegnuu foeura e g'hann daa ona tal mastegada de lassagh el sègn,
e l'è stada ben dada. Di frances, ona part hinn staa massacraa e
ona part faa presonee compres el scior Armagnac che, vegnuu per sonà,
l'è staa sonaa in piena regola. Siccome a istigà i frances
de vegnì giò eren 'staa i fiorentin gelos de la potenza di
Viscont, inscì el capitani Dal Verme l'ha pensaa ben de andà
a dagh el rèst ai toscani e ghe l'ha daa de maladètt. Gian
Galeazz, sèmper per la soa ambizion senza limit, ghe bastava minga
i titol de Signore di Milano e de Conte della Virtù, el vorreva
vèss Duca e per avègh on tal titol gh'è toccaa comprall
da Venceslao, Imperator, cont cent mila fiorin d'or e par che'l gh'abbia
faa propi el ristrètt, e l'è staa investii, come vassallo
imperial, da vinticinqu cittaa. E quèst el succed in del 1395. Parlèmm
poeu no de la solennitaa de la cerimonia de quand g'hann daa el manto e
i insègn Ducai ! Basta di che gh'era tutt i Vèscov e tutt
i ambasciator di potenz d'Italia. I spes, se capiss, i ha pagaa pantalon.
Quanti famili hinn andaa in rovina per la manera indecente che vegneven
continoament mongiuu! Siccome poeu l'apetitt el ven mangiand, se capiss
come de venticinqu cittaa ghe n'avèss minga assee. El pensa de comprà
Pisa per dusent mila fiorin e chii ghe l'ha venduda l'è staa Gerardo
Appiani, che l'era succeduu al pader in quèll domini. Siena inveci
la se dà a lu spontaneament e per mèzzo di so generai el
ven a vègh anca tutta la Lunigiana. Ma l'era minga content nancamò!
Sigura de no! Tant è vera che'l g'ha daa, el g'ha daa... fina che
l'ha poduu vègh: Perugia, Assisi, Nocera e Spoleto. Per favela curta,
de venticinqu cittaa l'è diventaa padron de trentacinqu e cioè:
Milan, Bergom, Brescia, Comm, Bormio, Novara, Vercelli, Alessandria, Tortona,
Casal, Bobbio, Valenza, Pavia, Lod, Crema, Cremona, Reggio, Borgo San Donnino,
Verona, Vicenza, Feltre, Belluno, Perugia, Arezzo, Nocera, Assisi, Spoleto,
Siena, Pisa, Pontremoli, Carrara, Sarzana, Parma, Piacenza e Bologna, e
scusee s'hinn pocch. E propi quand l'era adree a mèttes in coo la
corona d'Italia Gian Galeazz el moeur a Melegnan al trii de Settember del
1402. Lu che'l gh'aveva inscì paura de la pèste, per combinazion
l'ha incominciaa' a infierì in del 1398 e l'ha propi dovuu morì
de quèlla. Se veurom vèss giust, devom confessà che,
malgrado tutt, sto Duca l'ha tentaa ogni mèzzo per portà
la patria a on grado straordinari de floridèzza perchè oltre
al Domm e la Certosa, ghe se dev a lu di canai per la fertilitaà
de la campagna, ona Biblioteca e on'Accademia de Scoltura e Pittura a Pavia. |
Computers
