| Lucchin e Giovann Visconti gh'aveven donca el governo de Milan,
ma chii propi verament tegneva in man i reden l'era el Lucchin. Giovann,
essend staa faa Arcivèscov de Milan dopo vèss staa vèscov
de Novara, el lassava fa tutt al fradèll, el qual l'era jndifferent,
vizios, e la soa manera de viv l'aveva nauseaa i milanes fina al ponto
che aveven tentaa... coi bèi maner de spedill al mond de là.
La congiura, per vedè de desfesciass del Lucchin, l'era capitanada
da Francèsch Pustèrla, che'l gh'aveva i so bon reson de avèghela
su a mort cont Lucchino. Fatalitaa voeur che'l Viscont 1'avèss de
scoprì la congiura e tucc i congiuraa hann dovuu lassagh la pèll.
E l'è staa precisament in del 1341 che g'hann tajaa via el coo a
Francèsch Pustèrla, ai so duu fioeu e a soa miee Margherita
Visconti, cusina de Lucchin e per conseguenza anca de Giovann. Gh'è
chii sosten che a sping el Pustèrla a mèttes a la tèsta
de la congiura per fa mazzà Lucchin, la sia stada la miee per ambizion,
ma gh'è anca chii assicura che'l sia staa per vendicà el
so onor minacciaa da Lucchin che'l ghe faseva el broccol e de maladètt
alla miee. Bisogna però convegni che dopo la scopèrta de
la congiura, Lucchin l'è staa ciappaa da on fio fio, volgarmente
detto spaghetto, che le faseva camminà ben drizz e l'era diventaa
anca benefich. E guardee che hinn minga stori perchè quand è
vegnuu quèll'orrenda pèstilenza in del 1348, lu l'ha savuu
salvà Milan, e poeu l'ha daa svilupp al commercio e a tanti alter
bèi robb. Ma savii el proverbi: Che el loff el pèrd el pel
ma mai el vizi, per conseguenza l'ha comenciaa a odià i so trii
nevod Matteo, Bernabò e Galeazz, per el motivo che je credeva anca
lor complici in la congiura del Pustèrla, ma de proeuv ghe n'era
no, e malgrado quèst, dopo quattr'ann, essend aumentàa in
lu la diffidenza, l'ha pensaa ben de esiliai. La soa mierina cara, che
l'era Isabèlla del Fieschi de Gènova, on ann prima la gh'avuu
el caprizzi de andà a Venezia per vedè la gesa de S. March.
E fina chi' nient de mal. L'è vera o no? Ma l'è ben che l'è
andada cont on tal corteo che ghe l'avaria nanca avuu on'Imperatrice e,
stand a quèll che se diseva, par che i damm e i cavalier del seguit
n'abbien faa d'ogni èrba on fass e che anca la sciora Isabèlla
la sia minga stada indree. La roba la gh'è andada a orèggia
al Lucchin che l'ha daa foeura comè on arian, minacciand de maladètt
la dolce metà. L'Isabèlla, per la maronada, ghe s'è
incominciaa a strenges quaicoss e prusmand che'l mari per vendicass l'avaria
poduu anca fagh, la pèll, ghe sèccava on ciccin e a furia
de pensà e ripensà... la de avè conclus che puttost
de lee, el saria staa mèi che la pèll ghe l'avèss
fada a lu. E difatti, senza di nè vun nè duu, l'ha pensaa
ben de avvelenall. Inscì Lucchin el moeur a cinquantasètt
ann in del 1349... avvelenaa da la soa dolce metà. E' rèstaa
sol a governà el ,fradèll Giovann che, a onor del ver, l'è
staa el segond e l'ultim bon princip 'de la famiglia di Viscont. El comencia
a fa tornà indree i nevod che Lucchin l'aveva esiliaa e ciòe:
Matteo II°, Galeazzo II° e Bernabò. L'ha stabilii che a
la soa mort el domini el passass minga domà ai so trii nevod, ma
a tutt i mas'c discendent per linea legittima da Matteo I°. Dopo l'ha
pensaa anca a liberà Lodrisio e i so fioeu ch'eren in preson a S.
Colomban. Per rinforzà la casa Visconti cont del bèll parentori
el ghe dà per miee a Bernabò, Regina de la Scala, al Galeazz,
Bianca de Savoja e a Matteo ona Gonzaga. Coi danee di pover milanes
che moriven soffegaa dal pes di gabèll, l'ha compraa Bologna perchè,
a quanto par, allora se comprava i cittaa come andà a comprà
on polaster al mercaa e siccome per ambizion el ghe stava indree a nissun,
el g'ha faa guèrra ai Venezian, ai Carrares, ai Scaligeri, ai Estensi
e ai Gonzaga. Insomma, basta di che l'è riussii, dal port de Genova,
a spiegà sul mar, per la prima volta, el Bisson destand invidia
e paura ai alter princip d'Italia. L'ha poeu tentaa de fa rappacificà
i dò repubblich, quèlla de Genova e quèlla de Venezia
mandand, come ambasciator dal Doge Andrea Dandolo, nientemen che'l Petrarca,
ma è staa conclus nagotta. Allora la flotta de Genova ghe la fada
di a quèlla de Venezia che l'aveva tentaa de abbassà el Bisson
che, come già tucc sèmm, l'era el stèmma Visconteo.
Giovann Viscont l'ha poduu god pocch de la vittoria perchè l'è
mort in del 1354 lassand la Signoria ai trii nevod, che se l'hann divisa
inscì: al Matteo, che l'era el primm, gh'è toccaa: Lod, Piacenza,
Parma, Bologna e Bobbi; a Bernabò: Bergom, Brescia, Crema e Cremona;
e a Galeazz: Comm, Novara, Vercelli, Asti, Alba, Alessandria e Tortona.
Milan e Genova eren però soggètt a tucc e trii, staa riconossuu
vicari imperiali da Carlo IX° incoronaa a Milan, da dove però
l'è filaa pussee che imprèssa per el spavent che l'ha ciappaa
quand l'ha vist l'enorme milizia di Viscont. Se avègh on soci l'è
già ona roba difficil andà d'accord, disi poeu mi avèghen
duu! Per conseguenza el triumvirato l'è duraa pocch. Matteo l'ha
comenciaa a pèrd Bologna che la gh'è andada in di man a Giovanni
Visconti da Oleggio. Matteo el gh'era on poo in sui crost a Galeazzo II°
ed a Bernabò, e siccome, salvo eccezion, l'è giust el provèrbi:
amor de fradèll amor de cortèll, lor, da buoni fratelli,
eren pront a mazzass vun cont l'alter. Matteo el moeur on ann dopo a Monza,
e cioè el vintinoeuv Settember 1355. Se la vita scioperada che'l
faseva Matteo l'è stada la causa de la soa mort, se pò però
minga esclud che i so duu fradèi, semper per el gran ben che se
vorreven, l'abbien àjutaà andà al mond de là
cont del velèn. L'era forsi ancamò cald el Matteo, che i
alter duu s'hinn divis subit l'ereditaa. A Bernabò gh'è toccaa:
Bergom, Brescia, Cremona, Lod, Crèma, Soncin, Valcamonica, la Riviera
del Garda i castèi de Caravagg e Vaprio; a Galeazz inveci: Comm,
Alessandria, Tortona, Vigeven, Asti, Bobbi, Piacenza, Monza e col temp
anca Pavia. E' rèstaa ancamò in societaa Genova e Milan.
Genova, però, ghe l'hann avuda per pocch, perchè i genoves,
che di Viscont ghe n' aveven pien i scatol, s'hinn ribèllaa e hann
elegiuu a Doge Simon Boccanegra. I Viscont, credendes i padron del mond,
vorreven fagh guèrra a tucc, inscì i hann ciappaa su a Pavia
difesa dal Marches del Monferraa, dal Conte Lando, che l'era el capp d'ona
banda de masnadieri e da la grand'eloquenza del fraa Jacopo Bussolari che,
pover diavol, l'ha finii su'l patibol. In quattr'ann la cittaa l'è
stada ciappada e pèrsa quatter volt, fina che el Lando e i Beccaria,
padron de mèzz Pavia, s'hinn lassaa corromp dai palanch e Galeazz
el se sètta giò de padron in del 1357. Appèna in possèss
de Pavia, Galeazz el compra, l'è la parola, la man de Isabèlla
per so fioeu, tosa del Re de Francia, Giovanni II° di Valois, che'l
ghe dà in dota la Contea di Vertus in Sciampagna e al gèner
Gian Galeazzo el ghe assegna el titol de Conte di Virtù. Galeazz,
per non pèrd l'abitudin, l'era semper in guèrra cont tucc
e specialment cont el Marches del Monferraa, mandand inscì in ruvina
la Lombardia. Basta di che in voeuna de stii guèrr, el Marches del
Monferraa l'aveva miss al soldo la così dètta “Compagnia
Bianca”, composta da masnadier ingles, normanni, borgognoni, tedèsch
e spagnoeu che dove toccaven taccaven, come se dis, portand de per tutt
strage, devastazion e la pèstilenza per gionta e hinn mingà
ball, perchè in del 1361, domà Milan l'ha sottèrraa
la bellèzza de settantases mila mort. St'ultima guèrra
l'è finida in del 1364 per vèsses miss de mèzz l'Imperator
Carlo IV° e i Re de Ungheria e de Francia. Pandolfo Malatesta, Lucchino
Dal Verme, Giovanni Caimi e l'ingles Aucud eren i capitani de ventura al
soldo de Galeazz. Se Galeazz l'era on tiranno, on omm senza coeur,
capace de tutt fasend soffrì i pover milanes cont el soffegai de
tass e gabèll per podè fa su palanch, Bernabò l'era
el so dègn fradèll. Intanta che a Milan regnava la pèstilenza,
lu se ne stava tranquill come on papa in del so castèll de Marignano.
On bèll dì andand a caccia, el troeuva su'l pont del Lamber
duu fraa mandaa dal Papa el qual, giustament, ghe l'aveva su cont i duu
Viscont e cont Bernabò pussee ammò, per tutt i infamitaa
che commètteven. I duu fraa el fermen, e ghe consegnen la pergamena
che'l Papa el ghe indirizzava. Bernabò el ghe dà ona oggiada
e vist i rimprover e i minacc de Innocenzo VI° el se volta ai duu pover
fraa cont cèrti oeucc e ona faccia de fa paura, el ghe domanda,
mostrandegh la pergamena, se gh' aveven famm, e l'acqua del Lamber se gh'aveven
set! Per falla curta, ve disaroo che quij pover duu fraa hann dovuu, se
vorreven minga finì in del Lamber, mangiass la pergamena, la bolla
de'piomb che gh'era taccaa e anca i so duu bravi cordonitt de seda che
la tegneven ligada. Vun de quij fraa, l'era Guglielmo da Grimvaldo de Marsiglia,
staa poeu faa Papa, cont el nomm de Urbano V°. Se pò immaginass,
come l’infamia de Bernabò, se l'avèss ligada al dit. Se capiss
come cèrti robb se poda minga perdonai nanca vèss Papa. Galeazz,
semper per acquistass... simpatia e benevolenza, je pensava de nott per
fai del dì, infatti l'ha creduu ben de inventà on supplizi
noeuv tant per tegnì su on poo allegher la gent, ciamaa poeu: Quaresima
de Galeazz. Credi che infamia ,pusseè de quèsta l'avaria
minga poduu pensà el peggior tiranno. L'era on supplizi che' durava
quaranta dì... e scusee se l'è pocch. El primm dì
se ghe dava al condanaa cinqu còlp de corda, el segond dì
el se lassava riposà, per podè, al tèrz, tajagh via
i orègg, on alter dì se ghe cavava on oeucc, el dì
dopo l'alter, poeu se ghe tajava la man dèstra, dopo la sinistra
e via via per quaranta dì. Roba addirittura de fa vegnì su
la pèll d'oca. Se Dio voeur Galeazz el crèppa el quatter
Agost del 1378 in del castèll de Pavia. Sperèmm che'l Signor
ghi abbia faa pagà tucc carna salada. Però Pavia la ghe dev
al gran interessament de Galeazz se l’ha ottegnuu da l'Imperator Carlo
IV° on diploma in data tredes April 1361 col qual se creaven, oltra
a quèlla de Diritto che ghe l'aveva già, alter Facoltà
noeuv e per l'Universitaa de Pavia, stada fondada in del 825 da Re Lotario,
l'era minga ona roba de nagotta. L'era la vita d'ona cittaa perchè
Galeazz l'aveva miss l'obbligh a tucc i student del so domini che i studi
dovèssen fai a Pàvia. |
Computers
