| A Reggio Emilia, in del 1474, ven al mond Lodovico Ariosto. Gian
Galeazzo Maria Sforza de vott ann el ven acclamaa Duca de Milan e ve assicuri
che l'è on poo mèi de quèll'alter quantunque a vèss
mèi ghe vorreva pocch! Podend minga governà a vott ann, la
mader, Duchèssa Bona, la ghe dà i reden del governo in man
al bravo Simonètta, el qual l'ha tolt via subit i gabèll,
ch'eren staa miss ultimament, l'ha riconfermaa in carica i magistraa e
l'ha faa cessà la carestia fasend distribuì el gran a la
plebe affamada. Malgrado l'erede al Ducaa el fuss anmò on fioeu,
el gh'aveva già ona catèrva de nemis, e stii nemis eren i
so zij che, per el gran ben che ghe vorreven, agognaven de vedèll
mort, ma i pussee feroci e ambizios eren domà duu e cioè:
Ottaviano e Lodovico detto il Moro. La Duchèssa Bona, appèna
che l'aveva riconfermaa in carica come minister Cicco Simonètta,
i fradèi del Duca staa assassinaa, hann comenciaa a alzà
la crèsta, come se dis, cont el refudà i primm post in del
Consilli de la Giustizia e poeu cont el trà in pee, in del 1477,
ona sommossa a Milan. Ma avèven faa i cunt senza l'ost, perchè
chii l'ha vengiuda l'è stada la reggente, e i complici de la congiura
hinn staa miss al frèsch. Ottaviano, che l'aveva poduu scappà,
el nega in l'Adda e Lodovico el se mètt al sicur a Firenze. Mort
el Sforza, el fradèll Lodovico el ven riconossuu Duca de Bari e
minga cèrt scombussolaa per la congiura contra la cugnada, che l'era
andada mal, cont on esèrcit el se porta a Genova, che la faseva
pù part de la reggenza de Milan, ma minga sicur de conclud qualcossa
de bon e fasend minga tropp assegnament sui so forz, el giuga d'astuzia.
La cugnada, Duchèssa Bona, la s'era lassada andà on poo da
la birra cont on certo Tassino, so camerer, furb pussee del diavol e che
dopo on poo de temp che'l ghe faseva, come se dis in bon milanes, el moll,
l'era riussii a impadroniss del coeur de la Bona al punto de diventà
el cortigian pussee potent. Lodovico, che de la roba l'era al corrent,
per mèzzo del Tassino el se riconcilia cont la cugnada, senza però
che le sappia nanca l'aria, e a la sordina el compar chì a la Cort.
Cicco Simonètta a vedè el Moro e vegnigh un accident, l'è
staa istèss. Ciappaa la Duchèssa a quattr’oeucc el ghe dis:
Mi perdaruu la tèsta, ma lee la perdarà el Staat. Ma l'è
staa temp pèrs e fiaa traa via. Come se fa a fagh capì la
reson a una donna innamorada .... Lodovico, appèna el s'era mèttuu
ai cost de la cugnada, se pò immaginà come la lavorava e
l'ha mollada pù. El comencia a trà in pee di vèspee,
l'accusa el Simonètta de congiura contra i Sforza, e inveci eren
tutt ball inventaa de lu, e le mètt denter, poeu le fa giudicà
da giudes nemis del Simonètta, i quai, siccome la consegna l'era
quèlla de ronfà, el condannen a mort. Inscì al trenta
Ottober del 1480, quèll bravo minister, el lassa la tèsta
su'l patibol a Pavia. Lodovico, dopo avè spedii el pover Cicco Simonètta,
el ciappa el so post e subit el se mètt a giragh intorno al Tassino
e a pocch a pocch el ghe fa pèrd tutt el potere che’l gh'aveva.
Miss a post el Tassino non gh'era che de tajagh i gamb a la Duchèssa
Bona, e a furia de dagh el rièss a fagh rinuncià a la Reggenza.
Tra i due litiganti, chii godeva l'era quèll pover diavol de Galeazz
Maria, on bon princip, ma gioven e molto indree de cottura, tanto che Lodovico,
dopo avè separaa la mamma dal fioeu, el se dichiara lu so tutor
e el se mètt a governà in nomm del Duca. Lodovico, per rivà..
- dove l'era rivaa, el s'era faa sgabèll de tucc e specialment de
Roberto San Severino, che l'aveva ajutaa a soddisfà i so ambizion
e che'l se specciava chissà che ganassad a, mà appèna
che Lodovico el gh'avuu la Reggenza el g'ha daa el così dètt...
calcio dell'asino e come on limon spremuu l'ha sbattuu in d'on canton.
La pinnola l'era on poo amara de mandà giò e l'èra
uman che l'avèss de vendicass, e subit el se ribèlla; El
fa lega cont i Rossi de Parma, coi Fieschi de Genova e coi Venezian e insèmma
tramen ona congiura propi in del 1485 per mazzà Lodovico in gesa
de S. Ambroeus e ciamà subit indree la Bona, ma el colp el ghe va
mal e i coipevol l'hann pagada cara. Intanta, senza che nissun se ne cura,
Raffaèll el compiss i duu ann per vèss nassuu a Urbino in
del 1483. L'è leg de natura, vera, che ogni mas'c el dev vègh
la sua femmina, per conseguenza se pensa de dagh miee anca al pover Galeazz
Maria e a cercaghela ghe pensa Lodovico, el qual el mètt adoss i
oeucc a Isabèlla, tosa del Duca de Calabria e erede del reamm de
Napoli, che, del rèst, se se regordee, non l'era che la sposa che
gh'era già staa destinaa fina de quand Galeazz Maria el gh'aveva
trii ann. El matrimoni el ven faa in del 1488. Vorri vèghen un'idea
de la cultura e del lusso d'ona volta? Ve contenti subit. Quand Lodovico
l'ha vorsuu dagh miee al nevod, l'ha mandaa alla Cort de Napoli, per la
domanda formal, duu ambasciator compagnaa da trentases giòvin de
la nobiltaa milanesa, e ogni vun de lor el gh'aveva adree dodes servitor
vèstii de seda, cont gèmm e pèrla e i padron non faseven
alter che cambià vèstii, vun pussee bèll de l'alter
e i bracialètt che gh'aveven su vareven la bellèzza de sètt
mila fiorin d'or l'un. El disnà poeu che gh'è staa offèrt
a la sposa in Tortona, l'è unich negli annali, perchè pussee
d'on prosaich disnà l'è stada on'accademia poetica. Ogni
piatt l'era portaa in tavola d'ona persona mitologicament vèstida
la qual la presentava el piatt in vèrsi. El costumm l'era semper
analogh al piatt che serviven. Scommètti che qualghedun dirà:
Ghe vorreva pocch anca spiegà pussee ciar come eren vèstìi...
perchè, francament, capissom no come se poda vègh on costumm
intonaa al piatt che se mangia! Gh'avii minga nanca tort... mi ve'l disi,
ma... me raccomandi!... mitologia alla mano... se de no l'è un bosch!
Donca: Giassone el porta in tavola il vèllo d'oro portaa via dal
Colgo, Apollo, quèll biond, el porta el vitèll sgarbellato
a Admeto; Diana la porta in tavola Atteone trasformaa in cèrv; Orfeo,
i usèi che l'aveva ciappaa, ciamandi intorna a lu cont la soa cetra
intanta che'l cantava su l'Appenin; Atlanta la porta el cinghial caledonio;
Iride un bèll pavun; Ebe i vin pussee bon e l'ambrosia tolta da
la tavola degli Dèi; Apicio, vegnuu dai Campi Elisi, i robb pussee
appetitos; i Pastor d'Arcadia formagg e ricotta; Verttunno e Pomona la
frutta; le Najadii pèss... e via discorrend. E adèss quaivun
ne sa... come ne saveva, ma la colpa l'è minga mia. Però
davanti a tanto sfarzo gh'era anca una vita patriarcal e a dimostrall bastaria
la lettera che Francesco Sforza l'ha mandaa al nevod Galeazz Maria, el
qual l'annunciava al zio el so ritorno in compagnia del Marches de Mantova:
“venendo via dextesi, senza fare dimora in alcuno loco, veneresti a giungere
qua sabato proximo, et in quello dì le donne hanno ad lavarse el
capo et fare li facti soi” per conseguenza a Lod el sabet “et dominica
se facesse l'intrata che la brigata sarà in festa”. Malgrado i donn
se lavassen la tèsta e fasessen... i fatt so... al sabet, la polizia
la mancava completament perchè a quelle dame e cavalieri vèstii
d'or e de gèmm, anca senza occiai se ghe vedeva intorna al coll
i riann de ruff. La polizia vera saveven nanca cosa l'era e mancand la
polizia vegneva de conseguenza che saveven minga nanca dove stava de cà
l'igiene. A convinciov bastaria ona roba sola e cioè, che quand
s'è incomencia in del 1893 a ristaurà el Castèll segond
el piano e i progètt de l'architètt Luca Beltrami, che al
restaur el s'era daa anima e corp e cont disinterèss, s'è
minga trovaa un gabinètt che rigordass l'epoca Viscontea e Sforzesca,
ma domà di piccul vani, minga tropp comod, faa in del mur cunt un
bus dèstinaa... al vèrsament, senza uss che salvass almen
la decenza e nanca l'ombra d'un lavabos qualunque che confermass almen
che... a operazion fada se lavassen i man prima de mèttes a tavola.
Capissi che anca lor de vèss sporscelent gh'aveven minga tucc i
tort perchè allora ghera minga nè acqua potabil nè
fognadura e se ritornass dal mond de là vun di Viscont o di Sforza
el me disaria sicur de fass minga tant bèll de bocca, perché
anca nun domà una cinquantènna d'ann fa tornand a cà
da la Scala o dal Manzun tanti volt trovavum in cort la bonza di pozzi
neri che la mandava cèrti profumm molto in contrast cont el decoltè
de la miee e el sparaa del marì. E mi gh'avaria bèll e che
stoppaa la bocca perchè el primm impiant de l'acqua potabil el data
dal 1889 e in del 1890 se incuminciaa a fa la fognadura che a la fin del
1925 la gh'aveva un svilupp de 448 chilometri. L'è quindi al progrèss
che ghe devum se incoeu, anca in cà di operari, se troeuva el stanzin
de bagn e gh'è men mortalitaa. Sposaa el nevod, se sposa anca el
zio Ludovico in del 1491, e per miee el toeu Beatrice d'Este, tosa del
Duca de Ferrara. Appèna Isabèlla e Beatrice hinn in cà
insèmma... vattafarti? Subit se voeuren un ben che 'ciao!... e vann
d'accord come can e gatt! L'Isabèlla la voeur primeggià,
e dopo tutt la g'ha minga tort, perchè lee l'è la Duchèssa
de sangu regio, mentre la Beatrice non l'è che la miee del tutor
per quanto el guvernass lu e tutt stii stori imprèssionaven un poo
Ludovico. Quand un bèll dì riva a Milan, mandaa dal Duca
de Calabria pader de Isabèlla, di personagg d'alto bordo a ringrazià
el tutor per tutt quèll che l'ha faa, ma in l'istèss temp
el pregaven de vorrè affidagh al Duca Galeazz Maria l'autoritaa
che ghe spèttava, essend da temp andaa foeura da la minor etaa.
Insomma, l'era de dagh al... Ceser que'll che l'era del Ceser! El colp,
se capiss, l'era partii da Isabèlla stuffa di maltrattament de Beatrice
e de Ludovico che ghe lassaven anca mancà tutt. Ma el mal l'è
che Galeazz Maria el gh'aveva el cervèll, pover diavul, minga tropp
sviluppaa. El pader de Isabèlla, Duca de Calabria, vist che i preghier
de daghen un taj e passagh subit i reden a so gèner sèrven
a nagotta, el minaccia cui arma. Allora Ludovico el ciama Carlo VIII°,
Re de Francia, per andà a la conquista de Napoli, ma l'è
un pass che'l ghe costa car a tucc. Intanta, Cristoforo Colombo, proteggiuu
dai reali de Spagna, Ferdinand e Isabella, el va a la scopèrta de
la Merica, pàrtend cont trii barcon da Palus (Andalusia) el trii
d'Agust del 1492 cont centvint omen d'equipagg e dopo quarantaduu dì
de viagg, el mètt pee in l'Isula Guanhani el dodes de Ottober. Ma
quèst me disarii el ghe entra, cont la storia de Milan, come i cavol
a merenda, e in fond gh'avii minga tort, tant è vera che lassi là
el Colombo a daghela d'intend ai selvaggi e ciappi subit anmò quèll
pover diavul de Galeazz Maria. Intanta che Ludovico el se grattava in coo,
in del Castèll de Pavia, gravement infermo per consunzion, gh'era
el pover Galeazz Maria... che, dispias a dill, l'era al mond propi perché
gh'era un poo de post e nient'alter. Va a fagh visita Re Carlo VIII°,
vegnuu in Italia dopo l'invit de Ludovico, e Galeazz Maria el raccomanda
a lu la soa sposa, la soa bona Sabeloeu, i so duu bambitt, e a lu s'è
unii anca la desolada Isabèlla che la saveva minga dass paas a vedèss
a purtà via el mari inscì giovin! Difatti, Galeazz Maria
Sforza el mueur, vittima de l'ambiziun sfrenada de so zio, a vintiquattr'ann
in del 1494. Par che anca sta mort chi la sia Minga troppa genuina e che'l
velen el gh'abbia avuu la sua part. |
Computers
