| In del 1198, i milanes stuff di vèssazion di nobil, creen
el partii politich intitolaa "Credenza di S. Ambrogio", ma "peso el taccon
del buso", avarien ditt i venezian, perchè i discordi, invece de
finì, cressen e fann pèrd a la nostra repubblica la libertaa
inscì tanto desiderada, e cont quèsta va anca a fass benedì
la grandèzza del paes. I nobil hinn costrètt a lassà
Milan, I popolan troven tanta simpatia in la famiglia Della Torre, feudataria
de la Valsassina e ghe par minga vera de podè mèttess sotta
de lee. I nobil, che eren staa casciaa via come tanti can, ciamen ajutt
nientemen che a Ezzelino da Romano e cont lu ciappèn ona battosta
a Cassan. El scior Ezzelino da Romano, essend vera pèll de fa conscià,
el merita che se ghe spanda adree ona quai parola de pù. Lu, el
Buoso de Duera e Oberto Pelavicino eren i trii pussee famosi ghibellin
d'Italia. Ma per quanto vun el fudèss a stanga e l'alter a balanzin,
Ezzelino l'era el pussee sciatton, el faseva semper la part del leon. El
ved la mal parada su l'Adda, el tenta de scappà a Monza, ma i monsciasch
g'hann daa la pèstada; el tenta d'impadroniss del Castèll
de Trèzz, ma gh'è su'l gatt, come se dis, e su'l Pont de
Cassan el ciappa la mastegada in pien. El trasporten, ferii de maladètt,
a Soncino e là moeur senza on sospir, senza on lament, senza dì
ona parola e senza on pret quèll car Ezzelino da Romano che a tucc
el faseva paura pussee del diavol. E gh'aveven minga tort, quand se pensa
che'l gh'avuu el fidegh de dà l'ordin de macellà vundesmila
padovan e che, quand l'ha conquistaa el Fort de Friola sul Vicentin, el
g'ha faa brusà i oeucc a tucc quèi che ghe borlava in di
man. Domandi mi, se on esser simil, l'ha minga de fa vègnì
su la pell d'oca domà a sentì nominall! Sconfitt e mort Ezzelin,
Milan l'istituiss duu poteri noeuv: on Anziano della Credenza, Marun Della
Torre, e on Capitano generale dèl Popolo, Uberto Pelavicino, nominaa
Governator civil vun e militar l'alter. Abbiee pazienza e tornèmm
indree. In dèl 1187, moeur a Ferrara papa Urbano tèrz, Arcivèscov
de Milan, e ven nominaa, al so post, Milone da Cardano. Com'è, disarii,
l'era Papa e Arcivèseov de Milan?... Sigura. Urbano III° non
l'era che Uberto Crivello, milanes, che per quanto. Papa l'ha vorsuu conservass
lu la sede Arcivèscovil. Siccome l'usura in quij temp là
l'era al massimo grado, inscì i noster consol ghe mètten
on fren cont ona leg progèttada da Pagano Della Torre, consol de
la Repubblica, da Ugone Camerario, consol de Giustizia e da Uberto Diano,
consol di Mercant. Finalment, e l'era ora, se conclud la paas coi lodesan
e quèst l'è per merit de: Corrado Giudice, Alcherio Bonvesino
e Jacopo da Sesto. Trii bon milanes. Ma purtropp, quèll che se fa
incoeu ven desfaa doman e per conseguenza i milanes tacchen sotta ancamò
cont quèi de Besate, de Pavia, de Cremona, de Vigeven e finissen
a fa paas in del Luj del 1201 sotta i podestà: Tazio da Mandello,
Domenico Borro, Danesio Crivello, Ildebrando de Canavesi e Manfredo degli
Osii. In del 1206 moeur l'Arcivèscov Filippo da Lampugnano per iassagh
el post a Uberto da Pirovano che poeu el moeur anca lu per lassà
andà Arcivèscov de Milan el Cardinai novares Gerardi Sessa,
in del 1211, ma dopo on ann el moeur anca lu a Cremona. Se introduss a
Milan ona forma noeuva de governo, cioè dodes podestà, ma
i milanes se dichiaren apertament per Ottone IV°, per quanto el sia
on scomunicaa, e cascen via i canonich ordinari de la metropolitana. Se
pò immaginà come el sia andaa in furia Papa Innocenzo III°.
Se continoa semper a mènà i man, come se dis, fina a la vegnuda
de Uberto de Vidalta, on bolognes, staa faa podestà de Milan e che
con molto tatto l'e staa bon de mètt a post i ròbb, conciliand
i partii. E l'era mingà ona roba facil. Intanta gh'era sta faa Arcivèscov
Enrico da Settala. In del 1215, quantunque Rogerio el sia staa bon de fass
incoronà Re dei romani, i milanes consèrven i so simpatij
e la soa fed a Ottone IV°. Tra guèrra e paas vegnom al 1220,
propi in l'epoca che i fraa Domenican pienten el tribunal de l'inquisizion
in S. Eustorg. El capp de l'Inquisizion l'era Pietro da Verona, domenican,
che, per avè miss al bando come eretich Stefano Confalonieri d'Alliate,
l'hann coppaa tra Barlassina e Meda. El corp l'è staa portaa a Milan
e sottèrraa a S. Eustorg e col temp, poeu, l'è diventaa S.
Peder Martir. In del 1223 ven elètt podestà Pace da Manerbio,
brescian. In del 1225 tra el noster popol e l'Arcivèscov Enrico,
ven conclus la paas che la dura.. - finchè la dura. Tra i governant
di cittaa lombard se rinnova la lega contra Federico II°, nevod de
Barbarossa e ambizios all'eccèss, sta faa Re delle due Sicilie,
de Germania, d'Italia e Imperator. La paas de Costanza la ghe dava molto
sui nèrv, quindi el vorreva minga rispèttala assolutament.
In del 1227 moeur el Papa Onorio III° e ven faa Papa, cont el nomm
de Gregorio IX°, Ugolino, vèscov de Ostia. In del 1230 i milanes
osteggen el cont Tomaso de Savoia andand fina in Piemont, ma perduu in
battaglia Uberto da Ozeno, che l'era quèll che je guidava, i milanes
se ritiren. Moeur Enrico da Settala e ven elètt Arcivèscov
Guglielmo da Rizolio. In del 1233 ven fabbricaa el Palazz de la Ragione
in Piazza Mercant. Ma i guèrr finissen pù e i podestà
continoen a cambiass. I milanes invaden anca el staat del Marches del Monferraa,
ciappen el Castèll de Chivass, ma pèrden, trafitt da ona
saètta, Ardigoto Marcellino che je guidava. Tornen anca su'l territori
de Cremona che manden a foeugh e fiamm tanto che i modenes corren in ajutt
di cremones. Intanta se istituiss on'altra societaa militar dètta
dei Forti a la custodia del Carroccio; Enrico da Monza l'è 'l capp.
Semper in del 1233 ven conclus ona lega tra i milanes ed Enrico Re dei
romani che'l s'era ribèllaa a so pader Imperator el qual, per vendicass,
le fa mètt in preson dove el moeur dopo on ann. I guèrr se
pò di che continoen semper. In del 1237 i milanes tacchen ancamò
coi paves e fann di dagn. Ciappen poeu Lomèll e Garlasch. Torna
Federico II° in Italia, l'inonda Brescia de truppa imperial, ma Brescia
la rispètta el giurament faa ai milanès. El vintisètt
November 1237 Federico el fing de ritirass, el sé stend su la riva
dell'Oglio, ma i milanes, cont la compagnia dei Forti comandada da Enrico
da Monza, ghe tajen la strada, combatten e salven el Carroccio. Ma i milanes
finissen col pèrd. Federico ne fa strage, el liga el noster podestà
Pietro Tiepolo e trionfalment l'entra in Cremona. I milanes e alleaa perden
des mila personn. Federico el porta i presonee in Puglia dove proeuven
tutt i supplizi. In del 1238 Federico el va adree a fa conquist. I pover
milanes hinn costrètt a vegnì a patti, ma Federico insuperbii
el voeur che Milan el sia sotta de lu, ma i milanes giuren de morì
tucc puttost de subì on simil avviliment. In del 1239 Gregorio IX°
el scomunica Federico, al qual par che la scomunica la ghe faga nè
cald nè frègg, tant è vera che'l torna nel noster
tèrritori e Melegnan, Landrian e Bescape je conscia de sbatt via.
I milanes ascolten el consilii de Ottone da Mandello e se mètten
in armi e cont lor se uniss fraa e pret armaa come tanti d'Artagnan, se
accampen a Camporgano e comencen a pèstà giò cont
tal furia che Federico el se ritira a Cassino Scanasio dove ne ciappa sù
tant d'alter. I imperiai se sbanden tra Casorate e Rosate ma vègnen
ancamò ciappaa dai milanes dei quai senten per la tèrza volta
el savor e i presonee che ven faa hinn on bordèll. Sta vittoria
di milanes la costring Federico a lassà la Lombardia. E l'è
in del 1240 che, causa i continov guèrr, la finanza l'è in
ribass, el governo de la repubblica el dà foeura la carta monetada.
I dò repubblich de Venezia e Genova fann alleanza cont quèlla
de Milan, intanta i milanes, riconoscent a Pagano Della Torre, l'elegen
podestà ma l'ann dopo el moeur e i milanes el piangen su'l seri.
Elegen a podestà Filippo da Piacenza e a Arcivèscov Leone
da Perego. I paves tornen a romp i scatol, vègnen in del noster
tèrritori e fann presonee divèrs milanes. Goffredo Castiglioni,
vèscov de Sabina, el ven faa Papa cont el nomm de Celestino IV°.
Inscì per rid sèmm arrivaa a la porta de la gran epoca viscontea
e cèrtament la soa storia l'è molto pussee conossuda. Credi,
lassemm almen sta speranza, de vègh faa vegnì la barba a
nissun e che la storia de Milan de 1250 ann dopo Cristo, pur ridotta ai
minim termin, l'abbia poduu anca interessà on ciccinin. Cèrt
che me sont limitaa ai robb pussee important. Me pareva inutil a diff,
per esempi, che in del 580 sotta Papa Pelagio II°, vègnen introdott
le litanie maggiori! Che in del 875, compar ona comèta, cont ona
cova che la finiva pù e in del 990 on'altra cont cova idem. Che
in di ann 1076 e 1082 l'inverno l'è staa tant frègg che ai
pover milanes.. e affini, d'allora, ghe gelava via la ponta del nas. Che
on'altra comèta, anca lee cont la cova interminabil, l'è
comparsa in del Febbrar del 1107. Che in Luj del 1136 è vegnuu giò
ona tempèstada che s'era mai veduu la compagna. Che l'uso de fa
sonà la campana maggior de la metropolitana, l’è comenciaa
in del 1173. Che in Agost del 1222, oltre l'apparizion d'ona comèta,
gh'è staa ona scossa de tèrremott, on'inondazion e per completà
l'opera, gh'è andaa denter el mal anca in l'uga. Che on alter inverno
de maladètt i milanes ghe l'hann avuu in del 1234. Ad ogni bon cunt,
adèss savii anca quèst. Come ho ditt sèmm a la porta
del domini di Viscont, che preparen a la repubblica milanesa, quèll
che i Medici eren adree a preparagh a la repubblica fiorentina. Sui primm
se fann vedè bon, de manega larga, ma a pocch a pocch la... manega
la strengen e poeu fann sentì el savor de la soa... gran bontaa.
Ma andèmm avanti per ordin. Prima di Viscont, ona vera sovranità
ghe l'aveven i Torriani e se l'hann conservada ona trentènna d'ann.
In del 1250 moeur Federico II° e la guèrra che lu l'aveva faa
ai Guelfi de Lombardia l'è durada la bellèzza de quindes
ann e l'aveva ridott sta nostra povera tèrra lombarda in guisa tal
de fa pietà ai sass e pièna de malvivent. Intanta a Venezia,
in del 1250, nass Marco Polo. On ann de maladètt l'è staa
el 1257. Gh'era el foeugh sotta la sènner che covava e a fa s'cioppà
el bugnon, come se dis, l'è staa el nobil Guglielmo da Landriano
el qual l'era debitor vers on popolan, cèrto Guglielmo da Salvo.
On bèll dì l'invida el so creditor andà al castèll
a ciappà i danee e el Guglielmo da Salvo, cèrt, se le fa
minga di dò volt. El molla là pussee che imprèssa,
el ghe fa onor a la sènna che g'hann preparaa e dopo che stoo pover
diavol l'ha ben mangiaa e bevuu, propi in del moment de la digestion, cont
on sigurin, Guglielmo el nobil, el ghe spacca el coo. On sistèma
de pagà i debit come on alter. El cadaver, staa trovaa in d'on pajee,
l'hann portaa a Milan e l'hann espost per la strada. I milanes n'hann vorsuu
pù e tucc i nobil hinn staa, e minga cèrt cont i bèi
maner, casciaa foeura de la cittaa. Durant tutt stii bordèi moeur
l'Arcivèscov Leone, ma per cinqu ann hinn minga bon de trovagh on
succèssor, tant andaven d'accord, e inscì el Papa el crea
Arcivèscov de Milan Ottone Visconti. Vattafarti! Martino che l'era
el nevod de Pagano Della Torre e che l'era anca Rettore e Anziano della
Credenza, el se oppon e cont lu el clero; se refuden de riconoss quèll'Arcivèscov
faa dal Papa a la sordina, decrètand la confisca di beni arcivèscovij
cont el relativ esilio del prelato. Ven nominaa poeu, tant assee per mètt
fin ai insult che sta povera repubblica la riceveva da tutt i part, come
ona specie de Podestà, ona volta vun e ona volta l'alter, se capiss,
el marches de Incisa, Uberto Pelavicino e Carlo d'Angiò. E quèst
l'è staa el primm pass che Milan l'ha faa vèrs la monarchia.
Malgrado quèst però i Torriani eren semper i padron de la
melonera. On alter celebre Torriani l'è staa Napo, al qual tucc
doveven giuragh obbedienza assoluta. Siccome Ottone Visconti l'era sta
faa Arcivèscov de Milan in del 1262 a la sordina e savend lu stèss
de vèss... in gesa a dispètt di sant, el fa lega coi nobil
che eren staa casciaa foeura de Milan i quai, rabbios de podè no
entrà in cittaa, se vendichen mazzand a tradiment Paganino Della
Torre, fradell de Napo e podestà de Vercelli. El so cadaver, portaa
a Milan, l'ha dèstaa tanta indignazion tra i milanes i quai g'hann
vist pù e a la soa volta s'hinn vendicaa massacrand cinquantacinqu
tra fioeu e fradei dei fuorusciti che se trovaven in preson. Napo Torriani
el disapproeuva assolutament ona tal vendetta e per non vedè el
supplizi de tanti pover disgraziaa el lassa Milan addoloraa perchè
quèll sangu innocent el se saria poeu rivèrsaa cèrt
su de lu e i so fioeu. E, pover diavol, l'ha minga sbagliaa. Quantunque
Napo el fuss staa elètt Vicario imperial de Milan da Rodolfo e che
Milan la sia stada sciolta de l'interdètt e Gregori X° el vègniss
benignament a visità la cittaa, l'elezion de l'Arcivèscov
Ottone Visconti la stavà ferma |
Computers
