| E sèmm, insci per rid, al 452. E chi,
purtropp, comincen le dolenti note. Ven Attila, re degli Unni, che l'invad
l'Italia e senza di nè vun nè duu, el devasta Milan al punto
che la cèssa de vèss la sede di Imperator. Siccome sto noster
pover Milan l’è semper staa in man a can e borian, in del 476 el
ghe borla in di sciamp di Eruli menaa giò da Odoacre. Foeura di
sgrinf di Eruli borlom in quèi di Goti che, in del 493, guidaa da
Teodorico, s’impadronissen de Milan... e lassa che la vaga. Ma quèst,
in confront, l’é ancamò nagotta a quell che g’ha de vegnì.
Intanta in del 530 é nominaa véscov San Dazio, milanes. E
l’é in del 599 che piomba su Milan Uraia, nevod de Vitige, re goto,
e la nostra povera cittaa la va a l’inferno. E tutt per vendicass di milanes
perché, savend pù a che sant votass, aveven domandaa ajutt
all’Imperator d’Orient. Se dis che tresentmila milanes sien sta a massacraa
o venduu. Fémmegh pur la tara, ma quéll che é cért
che’l stermini el gh’é staa e de maladétt. Basta dì
che’l noster Milan el devéss staa rasaa al soeul perché non
gh’era rèstaa in pee che ona quai colonna e ‘na quai torrétta.
E Milan, già segònda capital de l’Impero Romano, l’era diventaa
men della Bovisa, tant è vera che per on bon mézz secol Milan
el se sent pù a nominà nanca... in la fila di can e i princip
ghe volten i spall e ciappen residenza a Pavia, Monza, Verona e Ravenna.
Pover Milan! El trii settember del 569, Alboino, capo dei Longobardi, el
ven e l’occupa el milanes, el stabiliss a Pavia la sede d’on nuovo regno
e poeu el fa el so bravo ingrèss a Milan. On regno abbastanza
bon, se voeurom véss giust, l’é staa quéll de Teòdolinda
cont so fioeu. In del 750 ven faa su la gesa de San Giorg, dètta
al Palazzo, perché se ritégn che lì taccaa ghe fuss
staa el palazz de Massimiano, Imperator roman, e noeuv ann dopo ven elètt
Tommaso Grassi, arcivèscov de Milan, e quèll l’è el
primm arcivèscov faa, perchè tucc i alter, S. Ambroeus compres,
non eren che vèscov. In del 770 da Desiderio, ultim Re dei
Longobardi, ven costruii la gesa de Sant Sist. Ma ses ann dopo, Carlo Magno,
el fa presonee Desiderio e el fonda on regno noeuv d’Italia. Inscì
la monarchia, così détta dei Longobardi, la g’ha fin, dopo
véss durada dusentsèdes ann precìs. Minaccia però
on pericol, quèll che’l rito ambrosian el vaga a fass benedì,
causa on trattaa combinaa tra ‘l papa Adrian e Carlo Magno. Ma Carlo Magno,
avend capii che l’aveva faa ona toppica, prudentement el revoca el decrètt...
e poeu el se nomina lu Re d’Italia. Ma a fagh capì verament a Carlo
Magno la gambarada che’l faseva cont el Papa Adrian a adottà domà
el Rito Roman e fa ritirà tucc i liber ambrosian, l’è staa
Eugenio Vèscov, se sa minga de qual diocesi, che a furia de insist
perchè se mancass minga de rispètt a S. Ambroeus l’ha ottegnuu
el so intent. Carlo Magno, dopo che gh’è nassuu on fioeu, che’l
ven ciamaa Pipino, el continoa la conquista del regno d’Itàlia cont
Pavia semper per capital. Intanta fann arcivèscov Pietro Oldrati,
milanes. Carlo Magno l’ha faa anca di leg e tra i tanti quèlla di
giudizi, dètta “della Croce di Dio”, che quasi semper la serviva
a nagotta e che la consisteva nell’obbligà i duu litigant a sta
on dato temp coi brasc avèrt come vèss in cros per podè
conoss chii di duu l’aveva giuraa el fals. Intanta Dateo, arcipret, el
fonda on ospizi per i trovatèi propi visin dove gh’è adèss
la Galleria Vittori Emanuèll e l’arcivèscov Pietro I°
el fa ricostruì per inter la Basilica Ambrosiana. Se andava avanti
anca minga mal, tant è vera che in del 796 è staa fondaa
la zècca milanesa che la batteva moned d’argent e anca d’or col
monogramma de Carlo Magno, ma siccome stoo pover Milan l’era minga staa
provaa assee, per completà l’opera ven, in del 801, anca el terremott
e siccome quand capita quij affari lì non fann che dagn, tanti cà
vann a tomborlon e tanti pover diavol se troeuven senza cà nè
tecc. Moeur Pipino, fioeu de Carlo Magno, in del 810 e Carlo Magno el ghe
va adree al vintott de gennar del 814. In del 836 ven fondaa la gesa de
Santa Maria Beltraa e quèlla de Santa Maria Maggior, ciamada però
jemale, perchè non se fonzionava che a l’inverno. Confèssi
che savaria no div el perchè la funzionava minga d’estaa. Intanta
l’arcivèscov Angilberto II° el fa fà i sepolcher a S.
Ambroeus, Gervas e Protas e l’altar maggior de la Basilica Ambrosiana.
El cinqu magg del 840 i milanes, per on ecliss total de sò, ciappen
on tal spaghètt de no dì. Eren semplicement terrorizzaa tant
che credeven che la fuss la fin del mond, ma malgrado l’ecliss, propi in
quèll di lì ven nominaa vicario imperiale el conte Leone.
Dopo vott ann, tant’assee de tegnì su on poo viscor stii pover milanes,
l’Imperator Lodovico el pensa ben de menai in guèrra contra i Saraceni
su’l napolitan. Cont che... consolazion sien andaa l’è pussee facil
immaginall che descrivel. In del 869 ven fondaa la gesa de S. Satir e duu
ann dopo quèlla a Maria Vergin, propi lì in di cinqu vij
e la gh’è ancamò adèss, fada fà da on certo
Werolfo ma che de soranomm ghe diseven Podone. In del 873, in Agost, inveci
de la passada di quaj e pernis, gh’è staa on tal passagg de cavallétt
che hann rovinaa tutta la campagna lombarda e per completà l’opera
s’è verificaa anca ona quàntitaa de fenomen in ciel e in
tèrra che i pover milanes per la paura eren terrorizzaa e saveven
pù nanca cosa ghe n’aveven in saccoccia... dato che in quèll’epoca
i saccocc ghi avèssen. E come la manna ven l’Arcivèscov Anspert
che l’aveva savuu acquistass de la potenza e subit el restaura Milan, el
ghe slarga la cinta, el fa costruì l’arco de la basilica de S. Ambroeus,
dove poeu dopo l’è staa seppèllii. E tutt quèst el
succed in del 881. Milan in... cinta el se trovava discretament ben. Pover
diavol, l’aveva soffèrt pussee che pussee pocch, quindi on premi
se le meritava e difatti in del 883 scioppa la pèste che la fa strage.
Cosa podeven desiderà de pù stii pover milanes? Cinqu ann
dopo, Berengario, duca del Friuli, l’è incoronaa Re d’Italia, ma
dopo trii ann, ecco che ven giò i Ungari che nissun i aveva ciamaa,
e, strada facendo, tant per ingannà el temp, devasten tucc i paes
rispèttand pèrò Milan. Meno male! In del 900, Lodovico,
Re de Provenza, el ven faa Re d Italia e se fabbrica la gesa de S. Maria
Segrèta. Ma Lodovico el ven casciaa foeura d’Italia da Berengario
el qual el mett la soa cort a Pavia. Ma la roba la se fa spèssa.
Lodovico el tra insèmma on esercit, ma de maladètt, el torna
in Italia, el cascia via Berengari, ma Berengari se le mètt minga
in saccoccia, el giura vendetta e el manten el so giurament. L’entra in
Verona a la sordina, el fa presonee l’Imperator Lodovico, el ghe fa rinnncià
a la Corona de Lombardia e me le fa scortà in Provenza, minga prima
però de vègh faa cavà i oeucc. L’è anca quell
li on gust come on alter! Malgrado sto delitt, Berengari in del 913 el
ven proclamaa in Roma, dal papa Giovanni X°, Re d’Italia... e lassa
che la vaga. Ma anca per lu gh’è el so castigamatt e difatti Rodolfo
II°, Re de l’alta Borgogna, instigaa da on cèrto Gilberto, el
ven in Italia, l’entra in Pavia e l’è acclamaa Re d’Italia. Berengari
el fing de mètt la bèrta in sen, el se ritira a Verona, ma
cònt on brus d’inferno. On bèll dì, ma brutt per lu,
approfittand d’ona scorreria che fann i Ungheri, el se uniss a lor, el
va sotta i bastion de Pavia e la mètt a fèrr e foeugh. Ma,
siccome el diavol el fa i pignatt e minga i covèrc, el ghe borla
in man a on pugn de congiurati, comandaa da on certo Flamberto che, senza
digh nè crèppa nè s’cioppa, el passen da ona pàrt
e l’altra. Berengari el rend l’anima a Dio e Rodolfo II° el riacquista
l’Italia. E quèst, per vèss precis, el succed in del 924.
Duu ann dopo e cioè in del 926, Rodolfo el se accorg che anca per
lu incomencia a tirà aria de tramontana; i amis diventen nemis e
fina i so parent ghe se mètten contra, e lu, vist la mal parada,
l’ha de vè ditt come Ferravilla.. “quasi quasi e meglio fuggir”
e l’è filaa pussee ,che imprèssa. La corona d’Italia ghe
la mètten in coo a Ugone, conte di Vienna, faa vegni apposta da
l’Arcivèscov Lamberto, e la Dieta de Pavia le proclama Re d’Italia.
Moeur l’Arcivèscov Lambèrt e ven faa Arcivèscov el
frances Ilduino e Ugone el se associa, nel regno, soo fioeu Lotario che’l
g’ha avuu in regali da Alda soa miee. L’è minga staa on regali straordinari,
perchè l’è vun de quij tai regaj che ancamò incoeu
i miee ghe fann ai so marì. Anzi ghe ne de quèi chè
guarda minga a spes e ghe ne regalen magara duu e fina trii per volta.
Ugone, content come ‘na Pasqua, l’approfitta de la zècca per fa
batt moneda cont sta leggenda chi: “ Hugo Piissim, rex - Christiana religio”.
In del 936, moeur Ilduino e fann Arcivèscov Arderico, di puro sangue
milanese. Semm in del 944 e Ugone el vorraria mètt su la sede metropòlitana
soo fioeu. Ma l’è minga ona roba facil! Pensa che te pensa, el provoca
ona lit indiavolada tra i milanes e, col pretèst de mètt
paas, el tenta de fa coppà el vègg Arcivèscov Ardeneo.
Ma siccome generalment tra i due litiganti il terzo gode, inscì
cent milanes, che gh’aveven nè colpa nè peccaa, ghe lassen
la vita. Scopèrta la trama, per fass perdonà, Ugone el regala
a la gesa ambrosiana la ricchissima badia de Monantola... e c’hii ghe n’avuu
ghe n’avuu. Se arriva insci, in del 950, a la fondazion de la gesa de San
Raffaèll. On ann dopo, Ottone, Re de Germania, el manda a Milan
so fioeu Litolfo, minga sicur per fa di spes, ma per vedè che aria
tira e sentì cosa disen e come la pensen i sciori de Milan. Litolfo
el torna da so pader, el ghe cunta tutt quèll che l’ha vist e l’ha
sentii e Ottone, fa su, come se dis, sacch e fusèlla el ven giò,
el corr a Pavia e là el se fa acclamà Re d Italia. El ven
poeu a Milàn e anca lu el fa batt’ subit moneda a la zecca, moned
d’argent che ghe diseven Ottolino cont la leggenda: “Otto Imperator Mediolanum”.
Intanta: Valperto de’ Medici, on ecciesiastich milanes, el riess, a furia
de dagh, a riconcilià Menasse e Adelmano che tucc duu vorreven vèss
nòminaa Arcivèscov, ma siccome de post de Arcivèscov
ghe n’è vun sol e podend minga contentai tucc e duu, tajandegh la
tèsta al tor, còme se dis, el se fa fà Arcivèscov
lu... e i duu aspirant rèsten cont on palmo de nas e forsi anca
de pù. In del 963 se fa i mercaa de la Cittaa, che vègnen
ciamaa Carobbi. In quèll de Porta Comacina non se vendeva che paja,
fen e legna e se comandava che: “Nullus Marosserius vel Mediator signorum
et feni possit ire vel stare in Broleto, vel super pontem Porta Cumana,
quand ligna vel femen vel palee ibi venduntur”. L’origin de la parola Carrobbio
par che la deriva da la parola latina Carruvium che la vorraria di on quadrivi
come ei gh’è ancamò incoeu in fond de via Turin e prima de
incomincià el cors de Porta Cines. In del 964 s’cioppa ammò
la pèste a Milan, e l’è inutil dì, che la fa strage
e che l’è, per la cittaa, on’altra batosta e minga de pocch. Nell’istèss
ann cèssà el governo monarchich de Milan che’l ven ricostruii
da on misto panera, perchè i Arcivèscov s‘eren miss anca
lor a fa la guèrra cont di sòldaa so de lor e che mètteven
insèmma a quèi dei sovrani, e eren comandaa da capitani speciai
della cittaa. Devi confèssà che me sont dimenticaa de di
che la prima cinta, fada dai ròmani, la girava la cittaa propi dove
gh’è adèss: S. Giovann in Conca, S. Maurili, la Scala, l’Agnèll,
S. Fedel. La segonda cinta, fada da Massimiano Erculeo vèrs la fin
del tèrz secol, l’era molto pussee larga perchè l’andava
fina al Carrobbi, in fond de via Amedei, via Maddalèna, in fond
de S. Zen, S. Francesch de Paola, S. Marcellin, S. Vicenzin, Santa Maria
Porta, S. Babila, che tanti voeuren che’l sia ona femmina menter inveci
l’è on mas’c autentich, e da S. Steven fina alla cròs de
Santa Enfemia. L’era minga ona gran cinta, ma i abitant eren pocch e ghe
staven denter minga mal. Oltre la cinta no gh’era che campagn e gran parch
pien de selvaggina. Basta di che, in del 925, 1’Arcivèscov Lambèrt,
l’ha invidaa a la caccia del cèrv Burcardo e la caccia l’è
propi stada fada in la campagna che andava da Piazza S. Steven a la gesa
de S. Nazzar. Chii l’è che le disaria, èh?... L’è
vera che de selvaggina ghe n’è ancamò a S. Steven, ma l’è
sui banch e la se vend carna salada. E in del frattemp ven edificaa i ges
de S. Cels, S. Vittor, S. Giovann a la Conca e el Monastee Maggior. Salvo
cambiament de Arcivèscov, per mort, gh’è propi nient de straordinari.
Nel 983 Milan l’è sotta el domini de l’Arcivèscov Landolfo,
el qual, oltrepassand i limit, el va a cercà rogna de grattà
incitand a la guèrra civil. Moeur a Roma Ottone II° Imperator
de Germania, e ses ann dopo la sciora Teofania, Imperatrice de Germania
e mader del piscinèlla Ottone III°, la ven chi e la rend tutt
el paes sòggètt a lee. Ma in del 991 la moeur e l’Italia,
ma specialment Milan, stann in pee cont di istituzion improntaa a vera
libertaa. Ma in del 996, Ottone III°, che l’aveva minga mangiaa per
nagotta e l’era vegnuu grand, me’l fann Re d’Italia. E l’è staa
on ann dopo che i pret hann incomenciaa a di la mèssa cantada. Sigura!
L’è propi staa in de l’ann 997 che i pret hann comenciaa a fa sonà
l’orghen e d’allora l’hann mollaa pù. Hann mollaa inveci... la miee!...
Com’è la miee? La miee, sì!... ma i pret... podeven toeu
miee? Sigura ! Voeuna sola però. E me par che la sia... anca tropp!
Siccome le così dette discipline de S. Ambroeus, concedeven on sol
matrimonio ai membri del clero milanes, se capiss come tanti se l’abbien
minga faa di dò volt e abbien tolt la soa brava miee e gh’avarann
avuu anca i so bravi fioeu. Ma Roma i pret cont miee e fioeu la pò
minga digerii e la voeur assolutament el celibato applicaa fina all’eccèss..
e la manda a Milan el direttor de la soa cort, Ildebrando, pur savend che
la diocesi de Milan l’è on ossètt on poo dur de resignà.
El noster Arcivèscov Guidone el voeur che sia rispèttaa assolutament
el privileg che g’hann i pret milanes de podè toeu miee, ma el Papa
scandalizzaa, el manda la scomunica a Milano... e inscì succed on
pien ... de Maria Luisa ... |
Computers
